Elde valıýtalyq operatsııalarǵa baqylaý kúsheıedi

ASTANA. KAZINFORM — Ulttyq bank basqarmasynyń 2026 jylǵy 31 naýryzdaǵy qaýlysymen valıýtalyq retteý jáne valıýtalyq baqylaý máseleleri boıynsha birqatar qaýlylarǵa ózgerister engizildi. 

Negizgi ózgeristerge sáıkes, elde valıýtalyq operatsııalarǵa baqylaý kúsheıtilip, bankterge operatsııalardy tekserý jáne zań buzý týraly habarlaý mindeti júkteledi. Sonymen qatar belgili bir qarjy shekterinen asatyn mámilelerge qosymsha talaptar engizilip, valıýtalyq operatsııalardyń ashyqtyǵy men zańdylyǵyn qamtamasyz etýge basymdyq beriledi.

• valıýtalyq baqylaý kúsheıtiledi: bankter operatsııalardy tekserip, zań buzý týraly habarlaıdy;

• shekti somalar belgilendi: jeke tulǵalar úshin — 10 000 AQSh dollarynan, zańdy tulǵalar úshin — 50 000 AQSh dollarynan bastap;

• birqatar operatsııa úshin valıýtalyq sharttyń eseptik nómiri mindetti bolady;

• bıznes sýbektileri valıýta satyp alý maqsattaryn rastaýy tıis;

• kapıtaldy zańsyz shyǵarýǵa táýekeli joǵary operatsııalarǵa (aýdarymdar, qaryzdar, ekonomıkalyq máni joq mámileler) baqylaý kúsheıtiledi.

Sonymen qatar jeke tulǵalar úshin jeńildikter saqtalady: 10 000 AQSh dollaryna deıingi aýdarymdardy shot ashpaı-aq júzege asyrýǵa múmkindik bar.

Qaýlynyń negizgi maqsaty:

• qarjylyq tártipti arttyrý;

• qarajatty zańsyz áketýmen kúresý;

• valıýtalyq operatsııalardyń tsıfrlandyrylýyn jáne ashyqtyǵyn qamtamasyz etý.

Qaýly 2026 jylǵy 19 sáýirden bastap qoldanysqa engiziledi.

Budan bólek, 2026 jylǵy 12 shildege deıin ýákiletti bankter men valıýtalyq baqylaý agentteri  baǵaly qaǵazdar naryǵynyń kásibı qatysýshylaryna qatysty norma ýaqytsha toqtatyldy, oǵan sáıkes olar tsıfrlyq qujattar servısinen alynǵan derekterdi tek ıesiniń kelisimimen ǵana paıdalana alady, al mundaı kelisim «elektrondyq úkimet» veb-portalyndaǵy jeke kabınet arqyly rásimdelip, portalǵa tirkelgen uıaly baılanys nómiri arqyly jiberiletin bir rettik parol nemese habarlamaǵa qysqa mátindik jaýap berý arqyly rastalady.

Buǵan deıin Ulttyq bank bazalyq mólsherlemeni jyldyń ekinshi jartysynda tómendetý múmkindigin qarastyratynyn jazǵanbyz.