Elde vagon jasaý salasynda jańa óndirister iske qosyldy
ASTANA. KAZINFORM — Qazaqstanda vagon jasaý salasyn damytýǵa baǵyttalǵan birneshe óndiristik joba júzege asyrylyp jatyr. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev málimdedi.
Mınıstrdiń aıtýynsha, ótken jyly Astanada jylyna 100 jolaýshylar vagonyn shyǵaratyn «Stadler Kazakhstan» zaýyty iske qosyldy.
— Kásiporyn 2030 jylǵa deıin «Qazaqstan temir joly» ulttyq kompanııasyna 557 vagon jetkizedi. Bıyl jańa jolaýshylar vagondary paıdalanýǵa berildi, — dedi Ersaıyn Naǵaspaev.
Sondaı-aq mınıstr negizgi jobalardyń biri retinde «ZIKSTO» zaýytynda jolaýshylar vagondaryn óndirýdi atady. Kásiporynnyń jyldyq qýaty shamamen 200 vagon.
2026–2027 jyldary óndiristi jańǵyrtý jáne qýatty arttyrý úshin quny 24 mlrd teńge bolatyn joba iske asyrylady. Nátıjesinde 470 jańa jumys orny ashylyp, jergiliktendirý deńgeıi ósedi.
Ótken jyly Atyraý oblysynda jylyna 6 myń júk vagony men tsısterna shyǵaratyn zaýyt iske qosyldy. Qazir kásiporyn sertıfıkattaýdan ótip jatyr, bıyl alǵashqy 70 vagondy shyǵarýdy josparlap otyr.
Mınıstrdiń aıtýynsha, bul jobalar salanyń óndiristik áleýetin arttyrýǵa yqpal etedi.
Aıta keteıik, Memleket basshysy Qasym-Jomart Toqaevtyń tapsyrmasyna sáıkes «Qazaqstan temir joly» ulttyq kompanııasynyń vokzal ınfraqurylymyn jańǵyrtý baǵdarlamasy aıasynda respýblıka boıynsha 124 vokzaldy jańǵyrtý jumysy bastalǵan bolatyn.
