Elde vagon jasaý salasynda ónerkásiptik klaster qurylady
ASTANA. KAZINFORM — Qazaqstan Respýblıkasy Premer-mınıstriniń birinshi orynbasary Nurlybek Nálibaev memlekettik organdardyń, «Qazaqstan temir joly» UK» AQ ókilderiniń, Atyraý vagon jasaý zaýyty, «ZIKSTO» AQ jáne «Semeı mashına jasaý» AQ basshylarynyń qatysýymen otandyq vagon jasaýdy damytý máseleleri jóninde keńes ótkizdi. Bul týraly Úkimettiń baspasóz qyzmeti habarlady.
Kásiporyn basshylary óndiristiń qazirgi jaǵdaıy, óndiristik qýattardyń júktelýi jáne odan ári damý josparlary týraly baıandady. Kásiporyndardy turaqty ári uzaqmerzimdi tapsyrystarmen qamtamasyz etýge, óndiristi damytýǵa, qazaqstandyq qamtý úlesin arttyrýǵa basa nazar aýdaryldy.
Nurlybek Nálibaev otandyq vagon jasaýdy ónerkásiptik kooperatsııa negizinde júıeli túrde damytý, shıkizat pen materıaldardy jetkizýshilerden bastap quramdaýyshtar óndirýshileri men servıstik kompanııalarǵa deıingi turaqty óndiristik tizbekti qalyptastyrýdyń mańyzdylyǵyn atap ótti.
Vagon jasaý salasynyń negizgi kásiporyndarynyń aınalasynda ónerkásiptik klaster qalyptastyrý qajettigi atap ótildi. Bul tásil quramdaýyshtar men jartylaı fabrıkattardy óndirýshilerdi, materıaldar jetkizýshilerin, servıstik kompanııalardy, ǵylym men bilim berý uıymdaryn biriktirýge múmkindik beredi. Nátıjesinde jańa jumys oryndary ashylyp, óndiris kólemi ulǵaıyp, salanyń básekege qabilettiligi artady.
Premer-mınıstrdiń birinshi orynbasary temirjol salasynyń qajettilikterin qamtamasyz etý kezinde qazaqstandyq kásiporyndardyń áleýetin barynsha paıdalanýdyń qajettigin atap ótti. Otandyq óndiristi damytý ımporttyq ónimge táýeldilikti azaıtyp, eldiń óndiristik bazasyn nyǵaıtýǵa múmkindik beredi.
Keńes qorytyndysy boıynsha memlekettik organdar men múddeli uıymdarǵa otandyq vagon jasaýdy odan ári damytý, qazaqstandyq qamtý úlesin arttyrý jáne óndiristik kooperatsııany keńeıtý jóninde tıisti tapsyrmalar berildi.
Aıta ketelik QTJ 2027 jyldyń sońyna deıin 131 jolaýshylar vagonyn satyp alady.
