Elde úıdiń baǵasy qalaı ózgerdi
ASTANA. KAZINFORM – 2025 jylǵy shilde aıynda turǵyn úıdi alyp-satý boıynsha 39 742 mámile tirkelgen, onyń ishinde jeke úıler boıynsha – 8 465 jáne kóppáterli úılerdegi páterler boıynsha – 31 277 mámile jasaldy.
2025 jylǵy maýsymmen salystyrǵanda (33 273) turǵyn úıdi satyp alý-satý mámileleriniń sany 19,4%-ǵa ósti. Mámileler sany boıynsha Astana (8 636 — 21,7%) jáne Almaty (8 432 — 21,2%) qalalary, sonymen qatar, Qaraǵandy oblysy (2 756 — 6,9%) kósh bastap tur. Mámileler sany Ulytaý oblysynda eń az — 247 mámile (0,6%).
2025 jyldyń maýsymymen salystyrǵanda shildede mámileler sanynyń eń kóp ósimi Qyzylorda (+70,6%) oblysynda jáne Astana (+42,2%), Almaty (+27,2%) qalalarynda tirkeldi. Al bir aıdaǵy eń kóp tómendeý Ulytaý (-12,4%), Atyraý (-10,9%) jáne Almaty (-5%) oblystarynda bolǵan.
— 2025 jylǵy maýsymmen salystyrǵanda, kóppáterli úılerdegi mámileler sany 23%-ǵa (5 848 mámilege) kóbeıgen. 2025 jyldyń shilde aıynda páterler boıynsha barlyǵy 31 277 mámile jasaldy, bul mámilelerdiń jalpy sanynyń 78,7%-y. Kóppáterli úılerdegi turǵyn úı saýdasynyń negizgi úlesi Astana (27,2%), Almaty (24,8%) qalalaryna jáne Qaraǵandy oblysyna (7,4%) tıesili. Bólmeler sany boıynsha 1 bólmeli páterler satylymy basym boldy, 2025 jyldyń shilde aıynda olar boıynsha 12 489 mámile resimdelgen.
2025 jyldyń maýsym aıymen salystyrǵanda shildede jeke turǵyn úıler boıynsha mámileler sany 7,9%-ǵa (621 mámilege) ósti. Shildede barlyǵy 8 465 mámile tirkelgen. Jeke turǵyn úıler boıynsha mámileler sanynyń eń kóp ósimi Almaty (+27,7%) qalasynda, Qyzylorda (+26,9%) jáne Mańǵystaý (+18,1%) oblystarynda baıqaldy. Al bir aıdaǵy tómendeý tek Jambyl (-2,8%) oblysynda boldy.
2025 jylǵy shildede turǵyn úıdi satyp alý-satý mámileleri aldyńǵy jyldyń tıisti aıymen salystyrǵanda 0,9%-ǵa azaıǵan, ol kezde 40 099 mámile resimdelgen bolatyn. Mámileler sanynyń eń joǵarǵy ósimi Qyzylorda (30%) oblysynda baıqaldy, eń úlken tómendeý — Ulytaý oblysynda (-46%). 2025 jyldyń qańtar-shilde aılaryndaǵy mámileler sanyn 2024 jylǵy qańtar-shilde aılaryndaǵy mámileler sanymen salystyrǵanda 3,4%-ǵa ósim baıqalady, — delingen Ulttyq statıstıka habarlamasynda.
Bir jylda (2025 jylǵy shilde 2024 jylǵy shildege) jańa turǵyn úılerdi satý baǵasy 9,6%, qoldanystaǵy páter naryǵynda 7,3% joǵarylady. Abattandyrylǵan turǵyn úıdi jalǵa alý tólemi 8,2% artty.
Óńirler bólinisinde jańa turǵyn úıdiń baǵasy Pavlodar qalasynda — 25,8%, Qyzylorda, Almaty qalalarynda — 15,3%-dan edáýir qymbattady. Qoldanystaǵy páterler naryǵynda eń joǵary baǵa ósimi Aqtóbe qalasy (19%), Pavlodar qalasy (15,8%), Almaty qalasynda (14,4%), al turǵyn úıdi jalǵa alý naryǵynda — Aqtóbe (32,6%), Semeı (23,2%), Kókshetaý qalalarynda (21,6%).
Bir aıdyń ishinde (2025 jylǵy shilde 2025 jylǵy maýsymǵa) jańa turǵyn úıdi satý baǵasy 0,2%, páterlerdi qaıta satý 0,9% ósti. Abattandyrylǵan turǵyn úıdi jalǵa alý tólemi 0,8% qymbattady.
Aıta ketelik Qazaqstanda turǵyn úı qatynastary týraly zańǵa mańyzdy ózgerister kúshine engen edi.