Elde ushaq otyny arzandasa, bılet baǵasy tómendeı me

ASTANA. KAZINFORM — Qazaqstan Úkimeti ushaq otynynyń baǵasyn tómendetý sharalaryn qabyldady. Osy jaǵdaıǵa baılanysty Kazinform tilshisi qazaqstandyqtar áýebıletterdiń arzandaýyn kúte ala ma degen suraqpen Kólik mınıstrligine saýal joldady. 

Eske salsaq, Qyzylordada ótken Ulttyq Quryltaı otyrysynda Prezıdent ushaq otynynyń qymbattyǵyna baılanysty salalyq memlekettik organdardyń jumysyna syn aıtqan bolatyn.

Synnan keıin Úkimet janarmaı baǵasyn tómendetýdiń naqty mehanızmderin jedel ázirledi.

Nátıjesinde, ushaq otynynyń tonnasy 1 200 dollardan 940 dollarǵa tómendetildi, al keıin ony 890 dollarǵa deıin azaıtý josparlanyp otyr.

Energetıka mınıstrligi bul shara otandyq áýejaılardyń básekege qabilettiligin arttyryp, Air Atlanta, Hungary Airlines jáne One Air sııaqty halyqaralyq avıakompanııalardyń reıster sanyn kóbeıtýge múmkindik beretinin habarlady.

Osyǵan baılanysty Kazinform tilshisi Kólik mınıstrliginen áýebıletter baǵasynyń tómendeýi múmkin be degen saýal joldady.

Mınıstrlik jaýabyna sáıkes, Qazaqstandaǵy jolaýshylar áýe tasymaly naryǵy memleket tarapynan rettelmeıdi.

— Qazaqstanda halyqaralyq tájirıbege sáıkes áýebıletterdiń baǵasy zań boıynsha rettelmeıdi jáne ony avıakompanııalar naryqtyq jaǵdaılarǵa saı ózderi belgileıdi. Qazaqstandyq avıakompanııalar bıletter baǵasyn ornatqanda dınamıkalyq baǵa júıesin qoldanady, — delingen mınıstrlik jaýabynda.

Mınıstrlik atap ótkendeı, bıletterdiń baǵasy eń aldymen suranystyń maýsymdyq erekshelikterine, ushaq túrine, reıstiń shyǵý ýaqytyna, bıletti satyp alý kúnine jáne basqa da faktorlarǵa baılanysty ózgeredi.

Sonymen qatar, baǵany negizsiz kótergen jaǵdaıda avıakompanııalarǵa qarsy antımonopolııalyq sharalar qoldanylýy múmkin. 

Aıta ketelik qaıtarylmaıtyn ushaq bıletteri boıynsha ózgeris engizý usynylǵan edi.