Elde ulttyq sport oıyndaryn damytýdyń memlekettik baǵdarlamasy men arnaıy zań ázirleý qajet - At sporty federatsııasynyń prezıdenti
ASTANA. 10 jeltoqsan. QazAqparat /Gúlmıra Álıakparova/ - Ulttyq sport oıyndarymyz kelmeske ketpes úshin olardy damytýdyń memlekettik baǵdarlamasy men arnaıy zań ázirleý qajet.
Bul týraly búgin QR Týrızm jáne sport mınıstrliginde ótken respýblıkalyq semınar-keńeste At sporty federatsııasynyń prezıdenti Sádibek Túgel aıtty.
Respýblıkalyq semınar-keńeste - «Ulttyq sporttyq órkendeýi» týraly 2012-2020 jyldarǵa arnalǵan memlekettik baǵdarlamanyń jobasy, Atbegilerdiń azamattyq Ar-ojdan kodeksi, «Ulttyq sport týraly» zańnyń jobasy, «At jarystary erejeleri týraly», «Ulttyq sporttyń tóreshileri týraly» zańdar men erejelerdiń jobalary talqylandy.
S.Túgeldiń aıtýynsha, qazir ulttyq oıyndarymyzdy damytý salasynda problema óte kóp. Respýblıkada ulttyq sportqa arnalǵan tehnıkalyq bazalar joqtyń qasy desek, ulttyq sport oıyndarynan ulttyq quramalardy daıyndaıtyn keshender múldem joq deýge bolady.
«Ondaı keshender kóbine jekelegen adamdardyń, monopolısterdiń qolynda. Olar onyń ishin qajetti quraldarmen jabdyqtaýǵa ynta tanyta bermeıdi», - deıdi ol.
S. Túgel, bapkerlerdi oqytyp, biliktiligin arttyrýǵa qajetti oqý-ádistemelik quraldardyń da bir júıege kelmeı otyrǵany óz aldyna bir problema ekendigin tilge tıek ete kele, joǵary oqý oryndarynda ulttyq oıyndardan bapkerlerdi, tóreshilerdi daıyndaıtyn fakýltetterdiń joqtyǵyn aıtty.
«Biliktiligi joǵary mamandardyń joqtyǵynan bapkerlerdiń, tóreshilerdiń, tórelik beretin taǵy basqa adamdardyń óreskel qatelikterin kórip jatamyz. Buǵan jete kóńil bólinbese, ulttyq oıyndarymyzǵa kir keltiremiz», - deıdi ol.
Onyń paıymdaýynsha, atalmysh túıtkilderdiń túıinin tarqatý úshin eń aldymen, elge Ulttyq sport oıyndaryn damytýdyń memlekettik baǵdarlamasy qajet. Buǵan qosa ulttyq sport týraly zań kerek. «Ulttyq sport oıyndaryn sport dep sanaımaıtyndar aramyzda áli kúnge deıin bar. Sondyqtan da buǵan arnaıy zań qajet», - dedi ol.
