Elde turǵyn úı saýdasy bir aıda 23%-ǵa ósti
ASTANA. KAZINFORM — 2026 jylǵy sáýir aıynda turǵyn úıdi alyp-satý boıynsha 35 154 mámile tirkelgen. 2026 jylǵy naýryzben salystyrǵanda (28 493) mámileler sany 23,4%-ǵa ósti. Bul týraly Ulttyq statıstıka bıýrosy habarlady.
Mámileler sany boıynsha Almaty (6 498 — 18,5%) jáne Astana (6 193 — 17,6%) qalalary, sonymen qatar, Qaraǵandy oblysy (2 841 — 8,1%) kósh bastap tur. Mámileler sany Ulytaý oblysynda eń az — 324 mámile (0,9%) tirkelgen.
2026 jylǵy naýryzben salystyrǵanda sáýirde mámileler sanynyń ósýi, Atyraý oblysyn (-5,6%) qospaǵanda, barlyq óńirde baıqalady. Eń joǵarǵy ósim Ulytaý (+55,8%), Qyzylorda (+49,4%) jáne Abaı (+45,7%) oblystarynda tirkeldi.
2026 jylǵy naýryz aıymen salystyrǵanda, kóppáterli úılerdegi turǵyn úı mámileler sany 21,2% (4 789 mámilege) ósti. 2026 jyldyń sáýir aıynda páterler boıynsha barlyǵy 27 331 mámile jasaldy, bul mámilelerdiń jalpy sanynyń 77,7%. Kóppáterli úılerdegi turǵyn úı saýdasynyń negizgi úlesi Astana (22,2%), Almaty (22%) qalalaryna jáne Qaraǵandy oblysyna (8,6%) tıesili. Bólmeler sany boıynsha 2 bólmeli páterler satylymy basym boldy — 10 204 mámile.
2026 jylǵy naýryzben salystyrǵanda sáýirde jeke turǵyn úıler boıynsha mámileler sany da 31,5% (1 872 mámilege) ósti. Sáýirde barlyǵy 7 823 mámile tirkelgen. Jeke turǵyn úıler boıynsha mámileler sanynyń eń joǵarǵy ósimi Soltústik Qazaqstan (+76,3%), Abaı (+73,1%) jáne Ulytaý (+71,4%) oblystarynda tirkelgen. Jeke turǵyn úıler boıynsha mámileler sanynyń tómendeýi tek Almaty qalasynda (-2,2%) bolǵan.
2026 jylǵy sáýirde turǵyn úıdi alyp-satý mámileleri aldyńǵy jyldyń tıisti aıymen salystyrǵanda 4,6% azaıdy, ol kezde 36 839 mámile resimdelgen bolatyn. Mámileler sanynyń eń joǵary ósimi Túrkistan oblysynda (+41,5%) baıqaldy, eń úlken tómendeý — Ulytaý oblysynda (-28,6%). 2026 jyldyń qańtar-sáýir aılaryndaǵy mámileler sanyn 2025 jylǵy qańtar-sáýir aılaryndaǵy mámileler sanymen salystyrǵanda 4,6% tómendeý baıqaldy.
Aıta ketelik bıyl 20,2 mln sharshy metr baspana tapsyrylatyny týraly jazǵan edik.
