Elde turǵyn úı satyp alý belsendiligi tómendegen
ASTANA. KAZINFORM – 2026 jylǵy aqpan aıynda turǵyn úıdi alyp-satý boıynsha 27 421 mámile tirkelgen, qańtarmen salystyrǵanda (27 745) mámileler sany 1,2% azaıǵan. Bul týraly Ulttyq statıstıka bıýrosynyń baspasóz qyzmeti habarlady.
Mámileler sany boıynsha Almaty (5 732 — 20,9%) men Astana (5 242 — 19,1%) qalalary, sonymen qatar, Qaraǵandy oblysy (2 250 — 8,2%) tizim basynda. Mámileler sany Ulytaý oblysynda eń az — 255 mámile (0,9%).
2026 jylǵy qańtarmen salystyrǵanda mámileler sanynyń eń joǵary oń dınamıkasy Abaı (+20,4%), Soltústik Qazaqstan (+14,2%) jáne Almaty (+10,4%) oblystarynda tirkelgen. Eń joǵary tómendeý Shymkent qalasynda (-28,3%), Jambyl (-15,8%) jáne Qyzylorda (-12,9%) oblystarynda baıqaldy.
— Bir aıdyń ishinde kóppáterli úılerdegi turǵyn úı mámileleriniń sany 2,1% (466 mámilege) azaıdy. 2026 jylǵy aqpanda páterler boıynsha barlyǵy 21 259 mámile jasaldy, bul mámilelerdiń jalpy sanynyń 77,5%-y. Kóppáterli úılerdegi turǵyn úı saýdasynyń negizgi úlesi Almaty (24,4%), Astana (24,1%) qalalaryna jáne Qaraǵandy oblysyna (8,6%) tıesili. Bólmeler sany boıynsha 1 bólmeli páterler satylymy basym boldy, 2026 jyldyń aqpan aıynda olar boıynsha 8 306 mámile resimdelgen, — delingen habarlamada.
2026 jyldyń qańtar aıymen salystyrǵanda jeke turǵyn úıler boıynsha mámileler sany aqpanda 2,4% (142 mámilege) ósti. Ótken aıda barlyǵy 6 162 mámile tirkelgen. Jeke turǵyn úıler boıynsha mámileler sanynyń ósýi Atyraý (+29,2%), Qaraǵandy (+27,4%) oblystarynda jáne Almaty (+26,1%) qalasynda tirkelgen. Eń kóp tómendeýi Ulytaý (-26,4%), Mańǵystaý (-19,4%) jáne Qostanaı (-16%) oblystarynda baıqaldy.
2026 jylǵy aqpanda turǵyn úıdi alyp-satý mámileleriniń sany byltyrǵy tıisti aıǵa qaraǵanda 5,5% azaıǵan, ol kezde 29 022 mámile resimdelgen bolatyn. Jyldyq mánde sámileler sanynyń eń joǵarǵy ósimi Atyraý oblysynda (14%) baıqalady, eń úlken tómendeý — Ulytaý oblysynda (-30,3%). 2026 jyldyń qańtar-aqpan aılaryndaǵy mámileler sanyn 2025 jylǵy qańtar-aqpan aılaryndaǵy mámileler sanymen salystyrǵanda 8% azaıǵan.
Aıta ketelik sońǵy úsh jyldyń ishinde elimizde 57 mıllıon sharshy metr turǵyn úı salynǵan edi.