Elde turǵyn úı qurylysy 3,6%-ǵa artty
ASTANA. KAZINFORM — 2026 jylǵy qańtar-tamyzda oryndalǵan qurylys jumystarynyń kólemi 15,6% ósip, 6 089,4 mlrd teńge boldy.
Respýblıka boıynsha qurylys jumystarynyń jalpy kóleminen jeke qurylys uıymdarymen 88,6%, sheteldik — 10,6%, memlekettik — 0,8% oryndaldy.
Aıta keteıik, 2026 jylǵy qańtar-tamyzda qurylys jumystary kóleminiń 2025 jylǵy qańtar-tamyzben salystyrǵanda ósýi ǵımarattardy salý jáne jóndeý jumystaryna (20%) baılanysty.
2026 jylǵy qańtar-tamyzda oryndalǵan qurylys jumystarynyń (qyzmetteriniń) túrleri boıynsha eń kóp úlesti avtomobıl, temir joldary men metrolar (25,5%), turǵyn emes ǵımarattar (21,4%) jáne turǵyn úılerdiń (12,8%) qurylysy alady.
— Aýmaqtyq bólinisinde respýblıkanyń on segiz óńirinde qurylys jumystary kóleminiń ulǵaıýy baıqalady. Edáýir ósý Ulytaý (2,9 ese), Pavlodar (41,4%), Atyraý (37,3%), Qyzylorda (26,9%), Túrkistan (23,5%), Qostanaı (21,4%), Abaı (20,6%), Shyǵys Qazaqstan (20,4%), Batys Qazaqstan (13,4%) jáne Mańǵystaý oblystarynda (13,1%), Almaty (16,7%), Shymkent (13,9%) jáne Astana (13,4%) qalalarynda baıqalady, — delingen habarlamada.
2026 jylǵy qańtar-tamyzda paıdalanýǵa berilgen jańa obektilerdiń jalpy alańy 14 214,7 myń sharshy metr.
Paıdalanýǵa berilgen turǵyn úılerdiń jalpy alańy 2025 jylǵy qańtar-tamyzben salystyrǵanda 3,6% kóbeıip, 11 326,1 myń sharshy metr boldy, olardan 7 500,4 myń sharshy metr — kóppáterli jáne 3783,7 myń sharshy metr — jeke úıler. Turǵyn úılerdiń edáýir bóligin — 10 841 myń sharshy metrdi nemese 95,7%-yn jeke qurylys salýshylar, onyń ishinde, 3 992,1 myń sharshy metrdi halyq paıdalanýǵa bergen.
2026 jylǵy qańtar-tamyzda bilim berý jáne densaýlyq saqtaý salasynda 19 620 oqý ornyna arnalǵan 36 jalpy bilim beretin mektep, 4 457 orynǵa arnalǵan 33 mektepke deıingi uıym jáne aýysymda 198 kelip-ketýshige arnalǵan 6 ambýlatorııalyq-emhanalyq uıym, sondaı-aq aýrýhanaǵa 120 tósek-oryn qosymsha paıdalanýǵa berildi.
Aıta ketelik Astanada qurylys alańdarynda tekserý kúsheıetini týraly jazǵan edik.
