Elde turǵyn úı alý erejelerine ózgerister engizildi
ASTANA. KAZINFORM — Elimizde memlekettik turǵyn úıge muqtaj azamattardy esepke qoıý jáne baspana berý tártibi jańartyldy. Tıisti ózgerister Ónerkásip jáne qurylys mınıstriniń 2025 jylǵy 30 qazandaǵy buıryǵymen engizildi.
Qujatta ýákiletti organnyń aqparattyq júıeler arqyly alatyn derekteri naqtylanǵan.
— Ýákiletti organ aqparattyq júıeler arqyly ótinish berýshi men birge turatyn otbasy músheleriniń turǵylyqty jeri boıynsha tirkeý mekenjaıy týraly, sondaı-aq olardyń sońǵy bes jyl ishinde memlekettik kásiporyndardyń turǵyn úı qorynan menshik quqyǵynda baspanasynyń bar-joǵy jónindegi málimetterdi alady. Sonymen qatar ótinish berýshi men onyń otbasy músheleriniń osy eldi mekende sońǵy bes jylda memlekettik mekemelerdiń turǵyn úı qorynan menshik quqyǵynda baspanasynyń bar-joǵy týraly aqparat ta tekseriledi, — delingen buıryqta.
Qujatta turǵyn úıge muqtajdar esebine qoıýdan bas tartýǵa negiz bolatyn birqatar jaǵdaı da kórsetilgen. Atap aıtqanda, eger:
— ótinish berýshi nemese onyń otbasy músheleri sońǵy bes jylda osy eldi mekende memlekettik mekemeniń turǵyn úı qorynan turǵyn úıge muqtaj retinde tirkeýge alynar kezde menshik quqyǵynda turǵyn úıge ıe bolsa nemese ıelik etken bolsa;
— ótinish berýshi nemese onyń otbasy músheleri sońǵy bes jylda Qazaqstan aýmaǵynda memlekettik kásiporynnyń turǵyn úı qorynan turǵyn úıge muqtaj retinde tirkeýge alynar kezde menshik quqyǵynda turǵyn úıge ıe bolsa nemese ıelik etken bolsa;
— ótinish berýshi men onyń otbasy músheleri memlekettik turǵyn úı qorynan nemese jergilikti atqarýshy organ jeke turǵyn úı qorynan jalǵa alǵan turǵyn úıde turyp jatsa;
— usynylǵan qujattar men málimetterde jalǵan aqparat bolsa;
— ótinish berýshi buǵan deıin memlekettik turǵyn úı qorynan turǵyn úı alyp, ony jekeshelendirgen bolsa;
— nemese ol turǵyn úıdi Ulttyq bank bekitken ıpotekalyq baǵdarlama, memlekettik josparlaý júıesi qujattary, memlekettik turǵyn úı baǵdarlamalary nemese Úkimet bekitken salalyq damý tujyrymdamalary aıasynda ıpotekalyq nesıe arqyly ıelengen bolsa.
Sonymen qatar qaǵıdaǵa Parlament depýtattaryna, Konstıtýtsııalyq sot pen Joǵarǵy sot sýdıalaryna, sondaı-aq ózge de sottardyń sýdıalaryna turǵyn úı berý men paıdalaný tártibi olardyń mártebesin aıqyndaıtyn konstıtýtsııalyq zańdarǵa sáıkes retteletini týraly jańa tarmaq engizildi.
Qujatta taǵy bir mańyzdy norma bar eger ótinish berýshi men birge turatyn otbasy músheleriniń sońǵy bes jyl ishinde memlekettik mekeme nemese kásiporynnyń turǵyn úı qorynan beriletin turǵyn úı alý sátinde menshik quqyǵynda baspanasy bolǵan nemese bolǵany anyqtalsa, turǵyn úı berýden bas tartylady.
Buıryq 2025 jylǵy 15 qarashadan bastap kúshine enedi.
Aıta keteıik, turǵyn úı kezegine turý úshin táýlik boıy qyzmet kórsetetin júıe iske qosyldy.