Elde týberkýlezdiń taralýy azaıyp, emdeý tıimdiligi artty
ASTANA. KAZINFORM — 2025 jyldyń qorytyndysy boıynsha Qazaqstan Respýblıkasynda týberkýlez boıynsha epıdemıologııalyq kórsetkishter jaqsaryp keledi, dep habarlaıdy Densaýlyq saqtaý mınıstrliginiń baspasóz qyzmeti.
Vedomstvo deregine sáıkes, týberkýlezben syrqattanýshylyq 9,9%-ǵa tómendedi. Taralý kórsetkishi 12,8%-ǵa azaıdy. Týberkýlezden bolatyn ólim-jitim kórsetkishi 10%-ǵa tómendedi.
— Emdeý tıimdiligi de artty: dárige sezimtal týberkýlezden jazylý kórsetkishi 90,5%-dy kurady, dárige tózimdi týberkýlezden jazylý kórsetkishi 85,3%-ǵa deıin joǵarylady, bul kórsetkishter Dúnıejúzilik densaýlyq saqtaý uıymynyń (DDU) standarttarynan joǵary. Belsendi týberkýlezben aýyratyn naýqastar sany 15%-ke azaıdy. Qazaqstan Respýblıkasynda týberkýlezdiń aldyn alý, dıagnostıkalaý jáne emdeý tegin medıtsınalyq kómektiń kepildendirilgen kólemine kiredi, — delingen habarlamada.
Elimizde MSAK uıymdary deńgeıinde týberkýlezdi erte dıagnostıkalaýdyń zamanaýı ádisteri engizilgen: GeneXpert apparaty arqyly júrgiziletin (týberkýlezge PTR) zertteý nátıjeleri 2 saǵat ishinde daıyn bolady. DDU usynymdaryna sáıkes, dárige tózimdi týberkýlez túrlerin emdeýde tıimdiligi joǵary, ınektsııasyz qysqa merzimdi 12 aıdan 6 aıǵa deıin emdeý rejımderi qoldanylady, bul emdeý rejımderi qabyldaýǵa yńǵaıly tabletka túrinde usynylady.
Týberkýlez ınfektsııasyn profılaktıkalyq emdeý úshin 1 aıdan 3 aıǵa deıingi jańa qysqa merzimdi rejımderi qoldanylady. Bul baılanysta bolǵan adamdar men qaýipti toptaryndaǵy tulǵalar arasynda belsendi týberkýlezdiń damýynyń aldyn alýǵa múmkindik beredi. Jyl saıyn naýqastardyń 95%-dan astamy áleýmettik qoldaýmen qamtylady. Ambýlatorııalyq deńgeıde naýqastardyń 40%-y emdeýdi beınebaqylaý rejıminde qabyldaıdy.
Densaýlyq saqtaý mınıstrligi ambýlatorııalyq kómek túrlerine, patsıentterdi áleýmettik qoldaýǵa jáne eldegi epıdemıologııalyq jaǵdaıdy odan ári jaqsartýǵa baǵyttalǵan halyqaralyq standarttardy qoldanýǵa basa nazar aýdara otyryp, týberkýlezdiń profılaktıkasyn, erte anyqtaý jáne qoljetimdi emdeýdi damytý jónindegi jumysty jalǵastyrady.
Buǵan deıin Almatyda týberkýlezben aýyrǵandar sany azaıǵany aıtyldy.