Elde tsıfrlyq tańbalaý arqyly 5,6 mln qorap kontrabandalyq temeki anyqtaldy
ASTANA. KAZINFORM — Elimizde temeki ónimderin mindetti tsıfrlyq tańbalaý engizilgeli beri aktsızder men salyq túsimderi 2,5 ese artqan. Sonymen qatar júıe 5,6 mln qorap kontrabandalyq temekini anyqtady. Bul týraly Astanada ótken Digital Tañba forýmynda QR Saýda jáne ıntegratsııa mınıstrligi Taýarlardy tsıfrlyq transformatsııalaý jáne tańbalaý departamenti dırektorynyń orynbasary Áset Óteǵalıev málimdedi.
Onyń aıtýynsha, tsıfrlyq tańbalaýdyń tıimdiligin birneshe jyldan beri mindetti talap engizilgen taýar sanattarynyń nátıjesinen kórýge bolady. Olardyń qatarynda temeki ónimderi, aıaqkıim jáne dárilik zattar bar.
Atap aıtqanda temeki ónimderin mindetti tańbalaý engizilgennen keıin osy taýar sanatynan túsetin salyq túsimderi men aktsız kólemi 2,5 ese ósken. Buǵan qosa júıe DataMatrix tsıfrlyq kody joq kontrabandalyq temekini anyqtaýǵa kómektesedi. 2021 jyly osyndaı 2,5 mln qorap ónim anyqtalsa, 2025 jyly bul kórsetkish 5,6 mln qorapqa jetken.
— Bul tsıfrlyq tańbalaýdyń kontrabandalyq ónimdi anyqtaýǵa kómektesetinin kórsetedi. Alaıda kontrabanda kólemi artty degen sóz emes. Ol burynǵy deńgeıde bolǵan. Tsıfrlyq tańbalaýdyń arqasynda zańsyz ónimderdi anyqtaı bastadyq. Sonyń nátıjesinde salyq túsimderiniń óskenin de baıqadyq, — dedi Áset Óteǵalıev.
Onyń aıtýynsha, aıaq kıim naryǵynda da oń ózgeris bar. Tsıfrlyq tańbalaý engizilgennen keıin osy taýar sanatynan bıýdjetke túsetin salyq kólemi burynǵy kezeńmen salystyrǵanda úsh ese artqan.
Saýda jáne ıntegratsııa mınıstrliginiń málimetinshe, tsıfrlyq tańbalaý taýardyń óndirýshiden nemese ımporttaýshydan bastap, sońǵy satylym núktesine deıingi qozǵalysyn baqylaı alady.
Eske salaıyq, buǵan deıin Prezıdenttiń kómekshisi Qýanyshbek Esekeev tsıfrlyq tańbalaýǵa jatatyn taýarlar tizimi keńeıip jatqanyn aıtqan edi.