Elde tórt jańa sý qoımasy salynyp, jeti sý qoımasy rekonstrýktsııalanady

Sý resýrstary jáne ırrıgatsııa mınıstri Nurjan Nurjigitov Islam damý bankiniń prezıdenti Muhammed Sýleıman Ál-Djassermen kezdesti. Kezdesýde taraptar halyqaralyq qarjy uıymynyń qoldaýymen Qazaqstanda júzege asyrylyp jatqan jobalardyń iske asyrylý barysyn jáne aldaǵy yntymaqtastyqtyń perspektıvalaryn talqylady.

Atap aıtqanda, Islam damý bankimen birlesip iske asyrylyp jatqan «Klımatqa tózimdi sý resýrstaryn damytý» jobasynyń alǵashqy kezeńiniń júzege asyrylý barysy qaraldy. Búginde barlyq uıymdastyrý jumysy tolyq aıaqtalyp, halyqaralyq konsýltanttar aıqyndaldy. Sonymen qatar ırrıgatsııa kanaldaryn rekonstrýktsııalaýǵa baǵyttalǵan 88 joba boıynsha qurylys-montaj jumystary bastaldy. Budan bólek, sý qoımalaryn salý jáne rekonstrýktsııalaý jumystaryn júzege asyratyn merdiger uıymdardy irikteý rásimderi júrgizilip jatyr.

Jalpy Islam damý bankimen jasalǵan kelisim aıasynda 4 jańa sý qoımasyn salý, qoldanystaǵy 7 sý qoımasyn rekonstrýktsııalaý, sondaı-aq jalpy uzyndyǵy 2,8 myń shaqyrym ırrıgatsııa kanaldaryn rekonstrýktsııalaý jáne kúrdeli jóndeý boıynsha 151 jobany júzege asyrý josparlanǵan.

 — Mınıstrlik pen Islam damý banki arasyndaǵy tyǵyz ári ózara tıimdi yntymaqtastyqtyń arqasynda qysqa merzim ishinde aýqymdy jumystardy atqara aldyq. Memleket basshysy men Úkimet júktegen barlyq mindetti birlesken kúsh-jigerdiń arqasynda tolyq júzege asyramyz dep senemin, — dedi Sý resýrstary jáne ırrıgatsııa mınıstri Nurjan Nurjigitov.

Óz kezeginde Islam damý bankiniń prezıdenti Muhammed Sýleıman Ál-Djasser birlesken jobalardyń sátti júzege asatynyna senim bildirip, Qazaqstannyń sý sharýashylyǵy ınfraqurylymyn damytýǵa baǵyttalǵan bastamalary Islam damý bankiniń ózge seriktes elderi úshin de úlgi bola alatynyn atap ótti.

Aıta ketelik Qazaqstan men Aljır sý resýrstary salasyndaǵy ekijaqty yntymaqtastyqtyń jol kartasyn ázirlemek.