Elde «Tilge boılaý» qazaq tiliniń biregeı jobasy júzege asyrylyp jatyr
ASTANA. KAZINFORM - Oqý-aǵartý mınıstri Ǵanı Beısembaev «Qazaq tili» halyqaralyq qoǵamynyń VIII quryltaıyna qatysty. Óz sózinde ol memleket tarapynan qazaq tilin oqytý sapasyn arttyrý jáne mektepterde qolaıly tildik orta qalyptastyrý maqsatynda jasalyp jatqan sharalarǵa toqtaldy.
Ótken jyldan bastap mektepke deıingi uıymdarda balalarǵa erte jastan memlekettik tildi úıretýge baǵyttalǵan «Tilge boılaý» baǵdarlamasy júzege asyrylyp jatyr. Mınıstr atap ótkendeı, bul ınnovatsııalyq tásil halyqaralyq tájirıbege negizdelgen, balalarǵa tildi tezirek meńgerýge kómektesip qana qoımaı, olardyń oqýǵa degen umtylysyn, shyǵarmashylyq damýyn yntalandyrady. Qazirgi ýaqytta joba elimizdiń bes óńirinde sátti júrgizilip jatyr.
- «Tilge boılaý» jobasy aıasynda oqýlar kún saıyn uıymdastyrylady jáne ártúrli ádis-tásilderdi qamtıdy. Ádistiń negizgi erekshelikteriniń biri - balalardyń shyǵarmashylyq áleýetin damytýǵa baǵyttalýy. Ol shektemeıdi, kerisinshe, ár balanyń qabiletterin ashady, bul sóıleýi men aýyzsha-logıkalyq oılaýyna oń áser etedi. Joba ata-analardyń suranystaryn eskere otyryp jasaldy. Ol osy jyldan bastap mektep júıesine kezeń-kezeńimen engizile bastaıdy, - dedi oqý-aǵartý mınıstri Ǵanı Beısembaev.
Bilim berý uıymdarynda qazaq tilin oqytý sapasyna erekshe kóńil bólinedi. 2024 jyly 5,5 myńǵa jýyq qazaq tili men ádebıeti muǵalimderi biliktilikti arttyrý kýrstarynan ótti. Alǵash ret 5-8 jáne 10 synyp oqýshylary úshin qazaq tilinen emtıhan tapsyrý engizildi, ol oqý baǵdarlamasyn tereńirek meńgerýge jáne bekitýge baǵyttalǵan.
Aıta ketelik qazaq tili úshin jańa tsıfrlyq platforma jasalatyny týraly jazǵan edik.