Elde tirkelgen jol apattarynyń 700-den astamyna balalardyń qatysy bolǵan – QR ІІM

ASTANA. QazAqparat – Jyl basynan beri elimizde balalardyń qatysýymen 700-den astam jol kólik oqıǵasy tirkelgen. Bul týraly Іshki ister mınıstrliginiń ákimshilik polıtsııa komıtetiniń basqarma basshysy Áset Ospanov málim etti, dep habarlaıdy QazAqparat tilshisi.

«Jaz mezgilinde balalardyń qaýipsizdigine erekshe mán beriledi. Sebebi kanıkýl kezinde olardyń bos ýaqyty kóp. Keıde balalar jol qaýipsizdigi erejelerin saqtamaı jatady. Ata-anasyna qarap boı túzeıdi, mysaly, ata-ana jol boıyn kesip óte salsa, ony kórgen bala qaıtalaıdy. Jyl basynan beri balalardyń qatysýymen 700-den astam jol kólik oqıǵasy tirkeldi», - dedi Áset Ospanov ortalyq kommýnıkatsııalar qyzmeti alańynda ótken baspasóz máslıhatynda.

Komıtet basshysynyń aıtýynsha, jol qaýipizdigin qamtý maqsatynda birqatar is-shara atqarylyp jatyr.

«Jol-kólik oqıǵalarynyń aldyn alý maqsatynda jyl saıyn «Nazar aýdaryńyz, balalar!», «Qaýipsiz jol», «Mektepke jol» taǵy sol sııaqty profılaktıkalyq sharalar ótkiziledi. Mysaly, 15-31 mamyr aralyǵynda el kóleminde «Nazar aýdaryńyz – balalar» is-sharasy ótti. Maqsaty-balalarǵa jol-kólik erejelerin úıretý, qaýipsizdiń mańyzdylyǵyn túsindirý», - deıdi ol.

Odan bólek, ІІM ókili balalardy tasymaldaıtyn avtobýstardyń talapqa sáıkestigi tekseriletinin aıtty.