Elde telemedıtsınalyq qyzmetterdiń úlesi 9,4 paıyzǵa jetti
ASTANA. KAZINFORM - Qazaqstanda telemedıtsına qazirgi zamanǵy densaýlyq saqtaý júıesiniń ajyramas bóligine aınalyp keledi. Búginde bul – bolashaqtyń tehnologııasy emes, patsıentterge araqashyqtyqqa qaramastan medıtsınalyq kómek alýǵa múmkindik beretin tıimdi qural.
QR Densaýlyq saqtaý mınıstrligi baspasóz qyzmetiniń habarlaýynsha, qazirgi ýaqytta telemedıtsınalyq qyzmetterge 655 medıtsınalyq uıym qosylǵan. Olardyń áleýetti qamtý aýqymy 2 mıllıonnan astam adamdy quraıdy. Búgingi tańda 1 mıllıonnan astam qazaqstandyq dárigerlerdiń qashyqtan konsýltatsııalaryn paıdalandy.
Telemedıtsınanyń arqasynda aýyldyq jáne shalǵaı eldi mekenderdiń turǵyndary oblystyq jáne respýblıkalyq klınıkalarǵa barmaı-aq beıindi mamandardyń keńesin ýaqytyly ala alady.
Bul medıtsınalyq kómekti kútý ýaqytyn qysqartýǵa, patsıentterdiń qarjylyq jáne ýaqyt shyǵyndaryn azaıtýǵa, sondaı-aq turǵylyqty jeri boıynsha úzdiksiz medıtsınalyq baqylaýdy qamtamasyz etýge múmkindik beredi.
Jyl basynan beri elimizdiń medıtsınalyq uıymdary 23,1 mıllıonnan astam medıtsınalyq qyzmet kórsetti. Onyń ishinde 2,17 mıllıonnan astam qyzmet qashyqtan usynyldy.
Telemedıtsınalyq qyzmetterdiń úlesi 9,4%-ǵa jetip, praktıkalyq densaýlyq saqtaý salasynda tsıfrlyq tehnologııalardy qoldanýdyń turaqty ósip kele jatqanyn dáleldeıdi.
-Densaýlyq saqtaý mınıstrligi telemedıtsınany odan ári damytýdy jalǵastyrady. Bul sapaly medıtsınalyq kómektiń elimizdiń árbir turǵyny úshin, turǵylyqty jerine qaramastan, birdeı deńgeıde qoljetimdi bolýyn qamtamasyz etýge baǵyttalǵan,-delingen habarlamada.
Osyǵan deıin 1 mlıllıonnan astam adamnyń telemedıtsınalyq qyzmetti paıdalanǵany týraly jazdyq.
