Elde tegin skrınıngten kimder jáne qalaı óte alady
ASTANA. KAZINFORM — 2026 jylǵy qańtar-qyrkúıek aılarynda medıtsınalyq-sanıtarııalyq alǵashqy kómek uıymdarynda 8 mıllıonnan astam skrınıngtik tekserý júrgizildi. Nátıjesinde 150 myńnan astam adam medıtsınalyq baqylaýǵa alyndy.
Densaýlyq saqtaý mınıstrligine qarasty Salıdat Qaıyrbekova atyndaǵy Ulttyq ǵylymı densaýlyq saqtaýdy damytý ortalyǵynyń málimetinshe, 2026 jylǵy qańtar-qyrkúıek aralyǵynda glaýkomany anyqtaý maqsatynda 1,74 mıllıon adam skrınıngten ótti. Olardyń shamamen 4,6 myńy medıtsınalyq baqylaýǵa alyndy.
Dárigerler olardyń densaýlyq jaǵdaıyn qadaǵalap, baqylaý tekserýlerin júrgizedi jáne qajet bolǵan jaǵdaıda em taǵaıyndaıdy.
Basqa baǵyttar boıynsha da mıllıondaǵan qazaqstandyq tekserýden ótti. Qant dıabetin anyqtaýǵa arnalǵan skrınıngpen 1,66 mıllıon adam qamtylyp, olardyń shamamen 30,7 myńy medıtsınalyq baqylaýǵa alyndy. Arterııalyq gıpertenzııa men júrektiń ıshemııalyq aýrýyn anyqtaý úshin 1,47 mıllıon adam tekserildi. Olardyń 97 myńy medıtsınalyq baqylaýǵa jiberildi.
Mı qan aınalymynyń buzylýyn erte anyqtaýǵa arnalǵan skrınıngten 281 myń adam ótti. Onyń ishinde 14,2 myńy medıtsınalyq baqylaýǵa alyndy.
Skrınıngtik baǵdarlamanyń taǵy bir mańyzdy baǵyty – onkologııalyq aýrýlardy erte anyqtaý. Sút bezi obyryna 1,09 mıllıonnan astam áıel, jatyr moıny obyryna 777 191 áıel tekserildi.
Kolorektaldyq obyrdy anyqtaýǵa arnalǵan skrınıngpen 1,35 mıllıon adam qamtyldy.
Tekserý nátıjesinde sút bezi obyrynyń 2 037, jatyr moıny obyrynyń 374 jáne kolorektaldyq obyrdyń 601 jaǵdaıy anyqtaldy.
Ótken jyldyń sáıkes kezeńimen salystyrǵanda glaýkomany anyqtaý skrınınginiń qamtý kórsetkishi 81%-dan 91,2%-ǵa, al qant dıabetin anyqtaý kórsetkishi 79,4%-dan 84,2%-ǵa ósti.
Arterııalyq gıpertenzııa men júrektiń ıshemııalyq aýrýyn anyqtaý boıynsha kórsetkish 84,8%-dan 79,7%-ǵa tómendedi.
Qazaqstanda skrınıngtik baǵdarlamalar da keńeıtilip keledi. 2025 jyly birqatar tekserý túrleri boıynsha joǵarǵy jas shegi 76 jasqa deıin ulǵaıtyldy. Sondaı-aq 50–76 jas aralyǵyndaǵy erler úshin mı qan aınalymynyń buzylýyn erte anyqtaýǵa arnalǵan skrınıng engizildi.
Skrınıng aýrýdyń belgileri paıda bolmaı turyp, onyń yqtımal belgilerin anyqtaýǵa múmkindik beredi. Eger tekserý nátıjeleri qosymsha naqtylaýdy qajet etse, azamattar tereńdetilgen tekserýge jiberiledi.
Sondyqtan nysanaly topqa kiretin azamattar densaýlyǵyna shaǵymy bolmasa da, skrınıngten ýaqytyly ótkeni mańyzdy.
Tekserýden tirkelgen emhana boıynsha tegin ótýge bolady. Al jumys isteıtin azamattarǵa osy maqsatta kúntizbelik jyl ishinde jumys orny men ortasha jalaqysy saqtala otyryp, úsh jumys kúnine deıin áleýmettik demalys beriledi.
2027 jylǵy qańtardan bastap emhanalar azamattardy tekserýge tsıfrlyq densaýlyq saqtaý servısteri, telefon baılanysy jáne basqa da arnalar arqyly qosymsha shaqyra alatynyn aıta ketken jón.
Bıylǵy 19 qazannan bastap Aqmola oblysynda, Abaı jáne Ulytaý oblystarynda 1414 nómiri arqyly skrınıngten ótý qajettigi týraly SMS-habarlamalar jiberý pılottyq jobasyn iske qosý josparlanǵan.
