Elde taratý protsesinde toǵyz bank bar — Mádına Ábilqasymova

ASTANA. KAZINFORM — Qarjy naryǵyn retteý jáne damytý agenttiginiń tóraǵasy Mádına Ábilqasymova eldegi bank júıesiniń qazirgi jaǵdaıyna túsinik berdi. 

— Ótimdi kapıtal jetkilikti jáne bankterdiń bankrottyǵy qaýpi joq. Qazirgi ýaqytta búkil qadaǵalaý júıesi bank júıesine tónetin yqtımal táýekelderdiń aldyn alýǵa baǵyttalǵan. Osy maqsatta jyl saıyn aktıvter sapasyn baǵalaımyz, bankterdiń nesıe portfelderin taldaımyz. Ekinshiden, bankterdiń stresstik jaǵdaılarda turaqtylyǵyn taldaý úshin qadaǵalaý testileýin júrgizemiz. Sonymen qatar, banktiń bıznes modelin, korporatıvtik basqarýy jáne basqa da táýekelderi baǵalanady. Osy baǵalaý negizinde jyl saıyn bankterdiń bankrottyǵyna jol bermes úshin tıisti sharalar qabyldanady, — dedi M. Ábilqasymova Senattyń jalpy otyrysynda.

Agenttik basshysy bankrottyq kezeńindegi bankterge memlekettik qoldaý berilmeıtinin atap ótti.

— Burynnan bankrot bolǵan bankterge memlekettik qoldaý kórsetilmeıdi, ıaǵnı oǵan tyıym salynǵan. Mundaı bankter taratylýǵa jatady. Qazirgi ýaqytta taratý protsesinde toǵyz bank bar. Olardyń lıtsenzııalary 2007 jyldan 2021 jylǵa deıingi aralyqta qaıtaryp alyndy, — dedi ol.

Onyń sózine qaraǵanda, osyǵan deıin memlekettik qoldaý tek qarjylyq turaqtylyǵyn qalpyna keltirýge qaýqarly bankterge kórsetilgen.

— 2017 jyly qarjylyq turaqtylyq baǵdarlamasyn ázirledik, onyń aıasynda alty bankke jalpy somasy 1,8 trıllıon teńge bolatyn memlekettik qoldaý kórsetildi. Olardyń úsheýi bul qoldaýdy merziminen buryn tolyq ótep, jalpy somasy 738 mıllıard teńgeni qaıtardy. Qalǵan úsh bank te bul memlekettik qoldaýdy merziminen buryn óteýdi josparlap otyr, — dedi Mádına Ábilqasymova.

Eske salsaq, jaqynda qaı bank memleketten alǵan kómegin tolyǵymen qaıtarǵanyn jazǵan edik.