Elde talqylanyp jatqan jańa zań jobalarynda qoldanystaǵy zańdardyń kemshilikteri eskerilýi kerek - N.Orazov
ASTANA. Tamyzdyń 23-i. QazAqparat /Aıdar Ospanalıev/ - Búgin Ádilet mınıstrliginde Úkimet janyndaǵy zań jobalary qyzmeti máseleleri jónindegi vedomstvoaralyq komıssııanyń otyrysy ótti.
Onda Memleket basshysy qol qoıǵan «Qazaqstan Respýblıkasyndaǵy quqyq qorǵaý qyzmeti men sot júıesiniń tıimdiligin arttyrý sharalary týraly» Jarlyǵynda kórsetilgen mindetterdi zańnamalyq qamtamasyz etý máseleleri talqylandy.
Jıynda «Qazaqstan Respýblıkasynyń keıbir zańnamalyq aktilerine teleradıo taratý máseleleri boıynsha ózgerister men tolyqtyrýlar engizý týraly» zań jobasy jóninde Aqparat jáne baılanys vıtse-mınıstri Nuraı Orazov baıandama jasady. Onyń aıtýynsha, teleradıo taratý salasy boıynsha qoldanystaǵy zańnamada «Buqaralyq aqparat quraldary týraly», «Baılanys týraly», «Lıtsenzııalaý týraly», «Jarnama týraly» sııaqty birneshe zańdar kórinis tapqan. «Eýropa men postkeńestik keńistiktegi elderdiń teleradıo taratý salasyndaǵy zańnamalyq tájirıbesi de osy salaǵa qatysy bar birneshe zańdarmen retteletindigin kórsetti», dedi vıtse-mınıstr.
Onyń sózine qaraǵanda, búgingideı aqparattyq tehnologııalardyń qaryshtap damyp otyrǵan tusynda teleradıo taratý júıesiniń kóptegen baǵyttary óz betinshe, stıhııaly túrde damydy. Buryndary teleradıo taratý júıesi bir ǵana baǵytta damysa, keıingi jyldary efırlik, kabeldik, spýtnıktik, symdy teleradıo taratý júıeleri de jetile bastady. Osyǵan qaraı elde teleradıo taratý operatorlary da kóbeıdi. «Osy rette aıta ketetin másele «Buqaralyq aqparat quraldary týraly» qoldanystaǵy zań aqparat quraly bostandyǵynyń jalpy ustanymdary men teleradıo taratý qyzmetin uıymdastyrý tetikterin qarastyrady. Alaıda bul tizimge teleradıo taratýdyń qyzmet túrleri men erekshelikteri kirmeıdi. Osy tektes máseleler elde talqylanyp jatqan zań jobalarynyń barysynda eskerilýi kerek», dedi N.Orazov.
