Elde taǵy 100 myń stýdent JI boıynsha tereńdetilgen kýrstardan ótedi

ASTANA. KAZINFORM — Jasandy ıntellektini meńgerý barlyq sala mamandaryna qatysty bolady. Bul týraly elordadaǵy Óńirlik ekologııalyq sammıtte Ǵylym jáne joǵary bilim mınıstri Saıasat Nurbek málim etti.

— Adamı kapıtal, bilim, ǵylym jáne ǵylymı-zertteý baǵyttary bizdiń jańa Konstıtýtsııamyzda basty qundylyqtar retinde belgilendi. Biz adamı kapıtalǵa erekshe nazar aýdaryp otyrmyz. Ekologııalyq mádenıet Qazaqstannyń basty qundylyqtarynyń biri retinde Konstıtýtsııanyń preambýlasynda kórsetilgen, - dedi S.Nurbek.

Onyń aıtýynsha, ekologııalyq sanany qalyptastyrý erte jastan, ıaǵnı balabaqshadan bastap joǵary oqý oryndaryna deıingi bilim berýdiń barlyq deńgeıinde qamtylýy kerek. Sondaı-aq ol halyqtyń ekologııalyq mádenıetin arttyrýǵa baǵyttalǵan Prezıdenttiń «Taza Qazaqstan» bastamasy júzege asyrylyp jatqanyn eske saldy.

Sonymen qatar mınıstr Qazaqstan bilim berýdegi tsıfrlyq tehnologııalarǵa basymdyq berip otyrǵanyn atap ótti. Naqtyraq aıtqanda, byltyr bakalavrıatta bilim alyp jatqan 673 myń stýdent jasandy ıntellektini kúndelikti ómirde qoldanýdy úırendi.

— Qazir qosymsha 100 000 stýdentti jınap jatyrmyz. Olar bul salada tereńdetip oqytylady jáne ózderiniń jasandy ıntellekt salasyndaǵy jobalary men agentterin jasaı alatyn deńgeıge jetedi. Atap aıtqanda, eki sýperkompıýter ornatyldy, árbir ýnıversıtette olardy paıdalaný úshin kvota bar. Biz tek IT mamandaryn ǵana emes, sonymen qatar basqa mamandyqtardyń ókilderin - ekologtardy, kitaphanashylardy, ınjenerlerdi jáne basqa da mamandardy daıyndaımyz. Bul bizge kez kelgen sektordaǵy tıimdilikti arttyrý úshin jasandy ıntellekti tehnologııalaryn qoldaný múmkindigin beredi, - dedi mınıstr.

Aıta keteıik, buǵan deıin QR Ǵylym jáne joǵary mınıstrligi eldegi qaı ýnıversıtterde sýperkompıýter ornatylǵanyn jáne olardy kimder paıdalana alatynyn túsindirgen edi.