Elde sý tasqyny qaýpi bar jol ýchaskeleri azaıdy — QazAvtoJol
ASTANA. KAZINFORM — Kóktemgi sý tasqyny jaǵdaıynda avtojoldardaǵy ahýal turaqty. Bul týraly «Qazavtojol» UK» AQ basqarma tóraǵasy Darhan Imanashev málim etti.
— «QazAvtoJol» ulttyq kompanııasy sý tasqyny kezeńi bastalǵaly kúsheıtilgen jumys rejımine kóshti. Respýblıkalyq mańyzy bar avtojoldarda qaýiptiń aldyn alý jáne saldaryn azaıtý úshin barlyq qajetti kúsh pen tehnıkalar jumyldyryldy. 2026 jylǵy 30 naýryzdaǵy jaǵdaı boıynsha avtojoldardaǵy ahýal turaqty jáne oń dınamıka baıqaldy. Atap aıtqanda, sý tasqyny qaýpi bar ýchaskeler sany 284-ten (2024 jyly) 184-ke deıin (2026 jyly) azaıdy. Al olardyń jalpy uzyndyǵy 206 shaqyrymnan 83,3 shaqyrymǵa deıin qysqardy. Sonymen qatar sý jaıylý oqıǵalary 174-ten 2 jaǵdaıǵa deıin tómendedi. Bul qabyldanǵan sharalardyń tıimdiligin kórsetti, — dedi Darhan Imanashev Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, sý ótkizý ınfraqurylymyn damytý da mańyzdy nátıje berdi. 2025 jyly jalpy 582 sý ótkizý qubyry ornatyldy. Onyń ishinde 162-si qaıta jańartý jobalary aıasynda, 54-i kúrdeli jóndeý kezinde, al 366-sy ortasha jóndeý barysynda júzege asyryldy. Al 2026 jyly taǵy 201 qubyrdy jóndeý josparlanǵan. Bul jumystar qar erigen kezeńde sýdyń kedergisiz ótýin qamtamasyz etýge baǵyttalǵan.
— Jalpy uzyndyǵy 25 myń shaqyrym avtojoldar jelisinde 1 429 kópir jáne 15 458 sý ótkizý qubyry bar. Sý tasqynyna daıyndyq aıasynda olardyń barlyǵy tolyq tazartyldy. Qazirgi kezde erigen sýdy ótkizý úshin 974 qubyr paıdalanylyp jatyr. Sý tasqynyna qarsy jumystarǵa 988 tehnıka tartylyp, arnaıy kezekshi brıgadalar jasaqtalǵan. Barlyq qyzmet problemaly ýchaskelerge jedel shyǵýǵa daıyn. Qazirgi ýaqytta joldardyń jaǵdaıy táýlik boıy baqylaýda. Úzdiksiz patrýldeý júrgizilip, gıdrologııalyq jaǵdaıdaǵy kez kelgen ózgeriske jedel áreket jasalyp keledi. Barlyq jumystar naqty ýaqyt rejıminde úılestiriledi, — dedi kompanııa basshysy.
Buǵan deıin habarlanǵandaı, «QazAvtoJol» mekemesi respýblıkalyq mańyzy bar joldarda sý basý qaýpi joǵary ýchaskeler týraly eskertetin aqparattyq pannolar ornatyp jatyr.
