Elde sý tasqynyna daıyndyq bastaldy
ASTANA. KAZINFORM — «Kóktem-2026» respýblıkalyq komandalyq-shtabtyq oqý-jattyǵýy bastaldy. Bul týraly TJM baspasóz qyzmeti habarlady.
Elimizde «2026 jylǵy kóktemgi kezeńdegi sý tasqyny jaǵdaıynyń qolaısyz damýynda tótenshe jaǵdaılardy joıý kezinde qutqarý jáne basqa da shuǵyl jumystardy daıyndaý jáne júrgizý» taqyrybynda «Kóktem-2026» respýblıkalyq komandalyq-shtabtyq oqý-jattyǵýy bastaldy.
Oqý-jattyǵý 25-27 aqpan aralyǵynda Azamattyq qorǵaý memlekettik júıesiniń jáne halyqtyń kóktem mezgili jaǵdaıyndaǵy tótenshe jaǵdaılardy joıýǵa daıyndyǵy men qabilettiligin arttyrý, azamattyq qorǵaý qyzmetteri men quralymdarynyń kóktem mezgilindegi TJ-ǵa den qoıýǵa daıyndyǵyn tekserý maqsatynda ótkiziledi.
Oqý-jattyǵýdy úılestirý jáne basshylyq etý respýblıkalyq shtaby Astana qalasyndaǵy TJM Strategııalyq josparlaý jáne jedel basqarý ortalyǵynyń bazasynda ornalasty.
Oqý-jattyǵýǵa respýblıkalyq azamattyq qorǵaý qyzmetteri, ortalyq atqarýshy organdar, jergilikti atqarýshy organdar, avarııalyq-qutqarý qyzmetteri men quralymdary qatysady.
Oqý-jattyǵý sheńberinde elimizdiń túkpir-túkpirinde tótenshe jaǵdaıdy joıý jónindegi is-qımyldardy pysyqtaý boıynsha komandalyq-shtabtyq jattyǵýlar, avarııalyq-qutqarý qyzmetterimen jáne azamattyq qorǵaý quralymdarymen praktıkalyq is-qımyldar ótkiziletin bolady.
— Oqý-jattyǵý barysynda «Barshanyń nazaryna!» dabyly boıynsha aýmaqtyq deńgeıdegi qulaqtandyrý júıesiniń daıyndyǵy tekseriledi, 25 aqpanda saǵat 11.00-de elimizdiń óńirlerinde barlyq sırena-sóıleý qondyrǵysy men elektrsırenalary qosyldy. Osyǵan oraı tynyshtyq saqtap, úreıge boı aldyrmaýlaryńyzdy suraımyz, — delingen habarlamada.
Aıta ketelik Almatyda 25 aqpanda dabyl sırenalary iske qosylatyny týraly jazǵan edik. Sonymen qatar sý tasqyny boıynsha naqty boljam 1 naýryzda daıyn bolady. Bıyl elimizdiń 5 óńirinde sý tasqyny qaýpi joǵary.