Elde iskerlik týrıster eń kóp baratyn aımaq belgili boldy
ASTANA. KAZINFORM — 2026 jyldyń alǵashqy alty aıynda Qazaqstannyń kýrorttyq aımaqtaryna iskerlik jáne kásibı maqsatpen 510,8 myń týrıst kelgen. Olardyń basym bóligi Almatynyń taýly týrıstik aımaǵyn tańdaǵan, dep habarlaıdy Kazinform agenttigi Ranking.kz saıtyna silteme jasap.
Qazaqstanda iskerlik kezdesýler, korporatıvtik saparlar, konferentsııalar men kórmelerdi qamtıtyn MICE-týrızm qarqyndy damyp keledi. Ranking.kz sarapshylarynyń málimetinshe, bul sala negizinen eki baǵytta órkendep jatyr. Birinshisi — iri qalalarda halyqaralyq is-sharalar ótkizý, ekinshisi — kýrorttyq aımaqtarda iskerlik kezdesýler men túrli jıyndar uıymdastyrý.
Birinshi baǵyttyń el ekonomıkasyna ákeletin paıdasy zor. Týrızm jáne sport mınıstrliginiń dereginshe, byltyr Qazaqstanda 13 iri halyqaralyq iskerlik is-shara ótip, elge shamamen 18 mıllıon dollar tabys ákelgen. Bul 2024 jylmen salystyrǵanda 20 paıyzǵa kóp.
Elimizdegi iskerlik týrızmniń negizgi ortalyqtarynyń biri — Almaty. Ótken jyly qalada uıymdastyrylǵan halyqaralyq is-sharalardyń nátıjesinde jergilikti bıýdjetke shamamen 3 mıllıon dollar túsken.
Ekinshi baǵyt boıynsha iskerlik jıyndar qalalarda ǵana emes, týrıster jıi baratyn demalys oryndarynda da ótkiziledi. Olardyń qatarynda qala syrtyndaǵy konferentsııalar, halyqaralyq jáne respýblıkalyq kórmeler, salalyq forýmdar, semınarlar men korporatıvtik is-sharalar bar.
Ulttyq statıstıka bıýrosynyń málimetinshe, sońǵy jyldary kýrorttyq aımaqtarda iskerlik týrızm aıtarlyqtaı jandana túsken. 2024–2025 jyldary bul aımaqtardaǵy qonaqúıler men demalys oryndarynda iskerlik nemese kásibı maqsatpen kelgen 1,1 mıllıonnan astam adamǵa qyzmet kórsetilgen. Bul — sońǵy jyldardaǵy eń joǵary kórsetkish.
Osylaısha, kýrorttyq aımaqtardaǵy qonaqúıler men demalys oryndaryna toqtaǵan árbir tórtinshi adam jumys babymen kelgen.
2026 jyldyń qańtar-maýsym aılarynda mundaı týrıster sany 510,8 myń adamǵa jetti. Olardyń 64 paıyzy — Qazaqstan azamattary, qalǵan 36 paıyzy — sheteldikter.
Іskerlik týrıster eń kóp baratyn oryn — Almatynyń taýly týrıstik aımaǵy. Bıylǵy alǵashqy jartyjyldyqta kýrorttyq aımaqtarǵa jumys babymen kelgenderdiń 77,3 paıyzy, ıaǵnı 395 myńǵa jýyq adam osy óńirdi tańdaǵan.
Ulttyq statıstıka bıýrosynyń derekteri Almatydaǵy taýly týrıstik aımaǵynyń demalys orny ǵana emes, jumys pen saıahatty ushtastyrýǵa qolaıly aımaqqa aınalyp kele jatqanyn kórsetip otyr.
Máselen, 2020–2025 jyldar aralyǵynda mundaǵy qonaqúılerge iskerlik jáne kásibı maqsatpen toqtaǵandar sany 2,5 ese ósken. Tek 2025 jyldyń ózinde Almaty taý klasteriniń qonaqúıleri 925,7 myń iskerlik týrısti qabyldaǵan. Bul 2024 jylǵy kórsetkishten 7,1 paıyzǵa joǵary.
Suranystyń artýyna baılanysty iskerlik is-sharalar ótkizýge arnalǵan ınfraqurylym da keńeıip keledi. Mysaly, Oi-Qaragai taý kýrortynda konferentsııalar, korporatıvtik kezdesýler men festıvalder uıymdastyrýǵa arnalǵan arnaıy oryndar ashylǵan.
Olardyń qatarynda 200 adamǵa arnalǵan Aqtas Hall konferents-zaly, 250 qonaqty qabyldaı alatyn Panorama shatyry jáne 3 myń adamǵa deıin jınalatyn ashyq alań bar.
Sońǵy eki jylda Aqtas jańa taý kýrortyn damytýǵa shamamen 58 mıllıard teńge ınvestıtsııa salynǵan. Bul qarjy aspaly joldar, meıramhana, qonaqúı bólmeleri men túrli is-sharalar ótkizýge arnalǵan oryndar salýǵa jumsalǵan.
Ulttyq statıstıka bıýrosynyń málimetinshe, 2026 jyldyń alǵashqy jartyjyldyǵynda Qazaqstannyń kýrorttyq aımaqtaryndaǵy qonaqúıler men ózge de demalys oryndary kórsetken qyzmetterdiń jalpy quny 91,2 mıllıard teńgege jetken.
Ranking.kz sarapshylarynyń esebinshe, osy qarjynyń shamamen 22,6 mıllıard teńgesi iskerlik maqsatpen kelgen týrısterge kórsetilgen qyzmetterden túsken. Bul kórsetkish týrısterdiń jalpy sanyndaǵy iskerlik maqsatpen kelgenderdiń úlesi negizinde anyqtalǵan.
Onyń ústine esepke konferents-zaldardy jalǵa berý, tamaqtandyrý jáne is-sharalardy uıymdastyrýdan túsetin qosymsha tabys kirmegen.
Qazaqstanǵa jumys babymen keletin sheteldikterdiń shyǵyny da artyp keledi. Ulttyq statıstıka bıýrosy júrgizgen zertteý nátıjesine sáıkes, 2026 jyldyń alǵashqy alty aıynda olardyń jalpy shyǵyny byltyrǵy sáıkes kezeńmen salystyrǵanda 5,4 paıyzǵa ósken.
Atap aıtqanda, sheteldik iskerlik týrısterdiń qonaqúıge jumsaǵan qarjysy 9,7 paıyzǵa, tamaqtanýǵa ketken shyǵyny 7,7 paıyzǵa artqan.
Eń joǵary ósim mádenı is-sharalarǵa jumsalǵan shyǵynnan baıqalǵan. Bul baǵyttaǵy shyǵys 24,1 paıyzǵa kóbeıgen. Al demalys pen sporttyq is-sharalarǵa jumsalǵan qarjy 22,2 paıyzǵa, emdeý jáne saýyqtyrý qyzmetterine ketken shyǵyn 13 paıyzǵa ósken.
Sarapshylardyń pikirinshe, bul derekter Qazaqstanǵa jumys babymen keletin sheteldikterdiń iskerlik sapardy demalyspen, mádenı is-sharalarmen jáne saýyqtyrý qyzmetterimen jıi ushtastyra bastaǵanyn ańǵartady.
Aıta keteıik, buǵan deıin ishki týrızm 84,4% óskeni habarlandy.
