Elde sırek metaldardy óndirýde qandaı ózgerister bar

ASTANA. KAZINFORM – Sırek metaldar boıynsha otandyq óndiris assortımenti jańa ónimdermen tolyqty. Bul týraly Úkimet otyrysynda QR Ónerkásip jáne qurylys mınıstri Ersaıyn Naǵaspaev málim etti.

- Óndiristi ártaraptandyrýda áleýeti joǵary baǵyttardyń biri –sırek metaldardy óndirý. Qazirde otandyq ónim eksportqa shyǵarylady jáne álemdik iri óndirýshilerdiń avıatsııa, teńiz tehnıkasy, elektronıka jáne elektr kólikteri óndirisinde qoldanylady. Sońǵy eki jylda otandyq óndiris assortımenti jańa ónimdermen tolyqty. Mysaly, tehnıkalyq selen jáne joǵary taza marganets sýlfatynyń monogıdraty alternatıvti energetıka salasynda qoldanylady. Al osy jyly gallıı shyǵaratyn óndiris iske qosylady, - dedi E. Naǵaspaev. 

Onyń aıtýynsha, ótken jyldyń jeltoqsanynda Memleket basshysynyń Japonııaǵa sapary kezinde ERG men Mitsubishi Corporation arasynda atalǵan metalldy jetkizý boıynsha ofteık kelisimshartqa qol qoıyldy.

- Sonymen qatar, jylyna 2,4 myń tonna tazartylǵan sýrma óndirisin iske qosý josparlanýda. Osylaısha, elimiz metallýrgııanyń midstream segmentindegi negizgi elder qataryna kirdi. Memleket basshysynyń tapsyrmasy aıasynda óńdeý ónerkásibiniń odan ári damýyn aıqyndaıtyn 17 iri joba tańdaldy. Bul rette Mınıstrlik 9 jobany qamtyp otyr. Olardyń ekeýi byltyr iske qosyldy. Qalǵan jobalar boıynsha jumystar jalǵasyp keledi. Barlyq toǵyz joba tolyq qýatqa shyqqanda óndiris kólemi 7,3 mıllard AQSh dollaryna deıin jetedi dep josparlanǵan. Bul ımportqa táýeldilikti azaıtýǵa jáne eksport áleýetin arttyrýǵa múmkindik beredi, - dedi mınıstr.

Budan buryn habarlanǵandaı, Ónerkásip mınıstri Qarmet-tegi ózgeristerge túsinik berdi.