Qazaqstanda SIM-karta alýdyń talaptary kúsheıdi

ASTANA. KAZINFORM — Elde SIM-kartaǵa qatysty jańa talap kúshine endi. Budan bylaı telefon nómiri bıometrııalyq tekserýden ótpeıinshe jumys istemeıdi.  Bul týraly Jibek joly telearnasynyń jańalyqtar qyzmetinde aıtty.  

Ár SIM-karta naqty bir adamǵa tirkelýi kerek. Baılanys kartasyn burynǵydaı dúkennen satyp alýǵa bolady.

Biraq ony iske qosý úshin bet-álpetti taný arqyly tirkelý qajet.

Smartfony barlar muny operatordyń qosymshasy arqyly jasaı alady. Al ınterneti joq nemese batyrmaly telefon ustaıtyndar baılanys ortalyǵyna baryp tirkeledi.

Jańa ereje boıynsha bir adam eń kóbi 10 SIM-karta ǵana ala alady.

Bul ózgeris ınternet-alaıaqtyqty azaıtý úshin engizildi. Sebebi sońǵy ýaqytta alaıaqtar tirkelmegen nómirlerdi jıi paıdalanǵan.

Máselen, ótken aıda Almatyda Reseı azamaty 300 SIM-kartamen ustaldy. 

Aıta ketelik ótken jyly 90 myńǵa jýyq SIM-karta tárkilengen edi.