Elde shyǵarylǵan avtokólikter sany qanshalyqty artty
ASTANA. KAZINFORM – 2026 jylǵy jeti aı qorytyndysy boıynsha elde avtokólik óndirisi 33,3%-ǵa ósti. Tek shilde aıynda Qazaqstanda 15 myńnan astam tehnıka shyǵarylǵan.
QR Ulttyq statıstıka bıýrosynyń dereginshe, 2026 jylǵy qańtar-shildede Qazaqstandaǵy kásiporyndar 111 115 avtokólik jáne basqa da tehnıkany shyǵardy. Bul byltyrǵy sáıkes kezeńdegi kórsetkishten (83 378) 33,3 paıyzǵa joǵary. Mashına jasaý salasynyń qurylymyndaǵy avtomobıl jasaý óndirisiniń úlesi 40,5%-dy qurady. Bıyl shildede Qazaqstanda 15 026 avtokólik pen basqa tehnıka shyqqan, bul byltyrǵy shildemen salystyrǵanda 27 paıyzǵa kóp (11 827).
«Qazaqstannyń Avtokólik Odaǵy» (QAO) prezıdenti Anar Maqashevanyń aıtýynsha, salanyń damýyna bıyl modeldik qatardyń keńeıýi men jańarýy eleýli úles qosyp jatyr. Bul óndiris pen lokalızatsııa deńgeıiniń ári qaraı joǵarylaýyna qosymsha múmkindik beredi.
Shildede zaýyttar 13 984 jeńil avtokólik (+31,8%), 587 júk kóligi (-6,5%), 146 avtobýs (-31,1%), 37 arnaıy jáne mamandandyrylǵan tehnıka, sonymen qatar 272 tirkeme jáne jartylaı tirkeme óndirdi.
Atap aıtqanda, 2026 jyldyń jeti aıynda Qazaqstan kásiporyndary 102 870 jeńil avtokólik (+36,4%), 4 009 júk kóligi (-2,0%), 1 612 avtobýs (+18,4%), 594 arnaıy jáne mamandandyrylǵan tehnıka (+26,9%), 2 030 tirkeme jáne jartylaı tirkeme (-1,1%) shyǵardy.
QAO málimetinshe, qańtar-shilde aılarynyń qorytyndysy boıynsha Qostanaıdaǵy Allur («SaryarqaAvtoProm») 41 010 avtokólik (-10,4%) shyǵardy. Almatydaǵy Astana Motors Manufacturing Kazakhstan 29 077 avtokólik qurastyrdy. Hyundai Trans Kazakhstan – 22 809 avtokólik (-26,3%), al Kia Qazaqstan 10 792 avtokólik shyǵardy.
Kommertsııalyq tehnıka men mamandandyrylǵan kólik óndirýshiler arasynda SemAZ – 1 774 tehnıka, QazTehna – 1 748, Hyundai Trans Almaty – 757, KAMAZ-Injınırıng 694 tehnıka qurastyrdy. Sonymen qatar Daewoo Bus Kazakhstan (337), Orbis Machinery (201) jáne «Ýralskagroremmash» AQ (122) kólik óndirdi.
- 2026 jylǵy qańtar men shilde aralyǵynda eń kóp shyǵarylǵan avtokólikter qatarynda Hyundai (22 779), Chevrolet (21 177), Kia (13 204), Changan (11 384), Chery (8 876), Haval (7 561), Jetour (5 158), JAC (3 980), Geely Galaxy (3 049) jáne MG (1 572) qamtylǵan, - dep atalyp ótken QAO aqparatynda.
Bıyl elde 190 myń avtokólik shyǵarylady
Ónerkásip jáne qurylys mınıstri Ersaıyn Naǵaspaevtyń aıtýynsha, avtokólik óndirisi salasy qarqyndy damyp kele jatyr.
Atap aıtqanda, keıingi 5 jylda salaǵa 457 mlrd teńgege jýyq ınvestıtsııa tartyldy. Byltyr 171 myńnan astam avtokólik shyǵarylyp, óndiris kólemi 18%-ǵa artty.
- Bul oń dınamıka bıyl da saqtalady. Osy jyldyń 6 aıynda 94 400 kólik shyǵaryldy, bul ótken jylmen salystyrǵanda 35%-ǵa joǵary. Bıylǵy jospar — óndiris kólemin 11%-ǵa arttyryp, 190 myń kólik shyǵarý. Jalpy bıyl avtomobıl shyǵarý salasy 131,1%-ǵa ósti, — dedi mınıstr.
Ersaıyn Naǵaspaevtyń málimdeýinshe, otandyq avtomobıl ónerkásibin odan ári damytý jáne onyń básekege qabilettiligin arttyrý maqsatynda mınıstrlik negizgi baǵyttardy aıqyndady.
Avtonesıege suranys kúrt artty
Qazaqstanda 2026 jyldyń ekinshi toqsanynda bankterdiń nesıe ónimderine, ıaǵnı ıpoteka men avtonesıege suranys artqan. Bul týraly Ulttyq banktiń bankter arasynda júrgizgen saýalnamasynda aıtyldy.
Avtonesıe boıynsha ótinishter sany birden 20% ósip, 1,5 mln-ǵa jetti. Alaıda bir ótinimniń ortasha somasy 3% tómendep, 7 mln teńge boldy. Suranystyń ósýine avtosalondardaǵy jeńildikter, sýbsıdııalanǵan paıyzdyq mólsherlemeleri bar baǵdarlamalar jáne bankterdiń resmı dılerlermen yntymaqtastyǵyn keńeıtýi áser etken. Avtonesıe boıynsha maquldaý deńgeıi 3 paıyzdyq tarmaqqa ósip, 18% boldy.
Ulttyq banktiń saýalnamasyna qatysqan bankter 2026 jyldyń úshinshi toqsanynda ıpoteka men avtonesıege suranys odan ári ósedi dep boljap otyr.
