Elde shegirtke oshaqtaryn dárileý sharalaryna 1 mıllıard 326 mln. teńge bólindi - Aýyl sharýashylyǵy mınıstrligi
ASTANA. Maýsymnyń 8-i. QazAqparat /Jasulan Amanbaıuly/ - Respýblıkada shegirtke zııankesteriniń oshaqtaryn dárileý sharalary qolǵa alyna bastady. Búgin Aýyl sharýashylyǵy mınıstrliginde ótken brıfıng barysynda Agroónerkásip kesheniniń memlekettik ınspektsııasy komıteti tóraǵasynyń mindetin atqarýshy Saqtash Hasenov shegirtke zııankesterimen kúreske baılanysty qolǵa alynyp jatqan keshendi sharalar jaıynda baıan etti,
dep habarlaıdy QazAqparat.
Onyń aıtýynsha, bıyl shegirtke zııankesteri 1 mln. 880 myń gektar aýmaqqa taralady dep boljanýda. Sonyń ishinde ıtalıandyq prýs - 1146,1 myń gektar, azııalyq shegirtke - 654,5 myń gektar, marokko shegirtkesi - 80,1 myń gektar alqapqa taralýy múmkin dep kútilýde.
Shegirtkege qarsy sharalardy uıymdastyrýǵa el bıýdjetinen qarastyrylǵan 1 326,7 mln. teńgeniń 771 mıllıony - pestıtsıdterge, 4,8 mıllıony - zararsyzdandyrý ónimderiniń tasymalyna, 548,7 mıllıony hımııalyq zararsyzdandyrý jumystaryn júrgizýge jumsalmaq.
«Búgingi kúni oblystarǵa, jergilikti eldi mekenderge shegirtkelerge qarsy sharalar júrip jatyr. Úıirli shegirtkelerdiń taralýyn tejeý máselesi tolyqtaı sheshildi», - deıdi S. Hasenov. Shegirtkelerdi jáne olardyń dernásilderin anyqtaý maqsatynda el boıynsha 2696,0 myń gektar jerge monıtorıng jasaldy.
S. Hasenovtiń aıtýynsha, Qazaqstan shegirtke zııankesterine qarsy birigip jumys jasaý maqsatynda Qytaımen, Qyrǵyz Respýblıkasymen, Reseımen jáne Ózbekstanmen ózara aqparattandyrý jáne ózara kómek kórsetý kelisimine qol jetkizgen. «Shegirtke qaýpi tóngen kezde olar bizge habar jiberedi. Biz sol aqparatqa sáıkes shuǵyl áreket jasaımyz», - dedi ol.
