Elde shaǵyn avıatsııany damytý qajet — Premer-mınıstr
ASTANA. KAZINFORM — Búgin Úkimet otyrysynda Premer-mınıstr Oljas Bektenov júk tasymaldaıtyn otandyq áýe kompanııasynyń parkine qatysty tapsyrma berdi.
— Biz Qazaqstanǵa sheteldik áýe kompanııalaryn ákelý, sondaı-aq tranzıttik júk reısteriniń sanyn arttyrý maqsatynda avıaotyn baǵasyn barynsha tıimdi ettik. Memleket basshysy júk tasymaldaıtyn otandyq áýe kompanııasyn qurýdy tapsyrdy. Bul joba qazirgi tańda júzege asyrylyp jatyr. Bıyl qazan aıynda alǵashqy júk borty Qazaqstanǵa jetkizilýge tıis. Kólik mınıstrligi osy máseleni erekshe baqylaýda ustasyn, — dedi Oljas Bektenov.
Sonymen qatar ol avıatsııa salasyn tabysty damytý úshin bilikti mamandar qataryn aıtarlyqtaı ulǵaıtý qajet ekenin aıtty.
— Ǵylym jáne joǵary bilim mınıstrligi Kólik mınıstrligimen birlesip, halyqaralyq standarttarǵa sáıkes keletin avıatsııalyq oqý ortalyǵyn qurý boıynsha sharalar qabyldasyn. Azamattyq avıatsııa akademııasy jańa deńgeıge kóterilip, sertıfıkattalǵan jáne álem moıyndaıtyn mamandardy daıyndaýy qajet. Shaǵyn jáne óńirlik avıatsııa úshin kadrlardy daıarlaý kezinde avıatsııa salasyndaǵy qoldanystaǵy oqý ortalyqtaryn paıdalanǵan jón, — dedi Úkimet basshysy.
Onyń sózine qaraǵanda, el ishindegi kommertsııalyq tasymaldarǵa túsetin júktemeni azaıtýǵa jáne azamattardyń qozǵalysyn yńǵaıly etýge múmkindik beretin shaǵyn avıatsııany damytýymyz qajet.
— Sonymen qatar mınıstrlik pen Qazaeronavıgatsııa qazirden bastap áýe kóliginiń barlyq túrin basqarýdyń biryńǵaı avtomattandyrylǵan júıesin qurýǵa kirisýi kerek, — dedi Premer-mınıstr.
Buǵan deıin qazaqstandyq áýe kompanııalaryna Taıaý Shyǵystaǵy jaǵdaı qalaı áser etip jatqanyn jazǵan edik.
2025 jyly qazaqstandyq áýe kompanııalar 15 mln jolaýshy tasymaldady. Bıylǵy alǵashqy 4 aıda jolaýshylar sany 4 mln-nan asty.
