Elde sary maı men kúnbaǵys maıy óndirisiniń kólemi artty
ASTANA. KAZINFORM – 2026 jylǵy qańtar–sáýir aılarynyń qorytyndysy boıynsha Qazaqstanda sary maı men kúnbaǵys maıy óndirisiniń turaqty ósimi baıqaldy.
Syrtqy saýda kórsetkishteri de oń dınamıka kórsetti: ónimniń eki sanaty boıynsha eksport kólemi ulǵaıyp, bul otandyq qaıta óńdeý ónerkásibiniń áleýetiniń artyp kele jatqanyn aıǵaqtaıdy.
Esepti kezeńde respýblıkada maılylyǵy 85% aspaıtyn 13,8 myń tonna sary maı óndirildi. Bul 2025 jyldyń sáıkes kezeńimen salystyrǵanda 47,4% artyq.
— Sary maı eksporty 40,4% ósti. 2026 jylǵy qańtar–sáýir aralyǵynda shetelge 394,1 tonna ónim eksporttaldy. Bul ótken jyldyń osy kezeńindegi 280,7 tonnamen salystyrǵanda aıtarlyqtaı joǵary. Negizgi eksporttyq naryqtar — Reseı, Mońǵolııa, Qyrǵyzstan jáne Belarýs. Sary maı ımporty 2 242,2 tonnany qurady. Іshki naryqtaǵy ımporttyq ónimniń úlesi 13,9% boldy. Negizgi jetkizýshiler — Belarýs pen Iran, — delingen habarlamada.
Tórt aıdyń qorytyndysy boıynsha ishki naryqta 15,7 myń tonna sary maı ótkizildi.
Kúnbaǵys maıy óndirisinde de oń ósim saqtalyp otyr. 2026 jylǵy qańtar–sáýir aılarynda otandyq kásiporyndar 335,5 myń tonna tazartylǵan jáne tazartylmaǵan kúnbaǵys maıyn óndirdi. Bul ótken jyldyń sáıkes kezeńimen salystyrǵanda 13,2% kóp.
Kúnbaǵys maıynyń eksporty 49,6% artty. 2026 jylǵy qańtar–sáýir aılarynda eksporttyq jetkizilimderdiń kólemi 353,8 myń tonnany qurady, al ótken jyldyń osy kezeńinde 236,4 myń tonna ónim eksporttalǵan. Negizgi eksport baǵyttary: Ózbekstanǵa — 153,2 myń tonna, Qytaıǵa — 127,2 myń tonna, Aýǵanstanǵa — 38,6 myń tonna, Tájikstanǵa — 27 myń tonna, Iranǵa — 4,9 myń tonna jáne basqa da elder.
Kúnbaǵys maıynyń ımporty 47,9 myń tonna boldy. Bul rette ishki naryqtaǵy ımporttyq ónimniń úlesi tómen deńgeıde qalyp, 12,5% qurady. 2026 jylǵy qańtar–sáýir aılarynda Qazaqstannyń ishki naryǵynda 29,7 myń tonna kúnbaǵys maıy ótkizildi.
Aıta ketelik Qazaqstan kúnbaǵys maıy eksportynan álemde 6-orynǵa shyqqan edi.
