Elde «sán-saltanat salyǵy» qalaı jumys isteıdi
ASTANA. Kazinform — Memlekettik kirister komıteti qoǵamda «sán-saltanat salyǵy» dep atalyp júrgen normalardyń qoldanylý tártibin túsindirdi.
MKK-niń óndiristik emes tólemderdi ákimshilendirý basqarmasynyń basshysy Gúlmıra Smaǵulovanyń aıtýynsha, bul jańa salyq túri emes. Bul — qoldanystaǵy salyq júıesi aıasynda qymbat múlikke qatysty qoldanylatyn joǵary salyq mólsherlemeleri.
Onyń aıtýynsha, salyqty eseptegende negizgi ólshem retinde azamattyń barlyq múlkiniń jıyntyq quny alynady. Eger onyń jalpy quny 450 mln teńgeden assa, salyq progressıvti mólsherlememen esepteledi.
— Múliktiń qaı óńirde ornalasqany eskerilmeıdi. Belgilengen shekten asqan jaǵdaıda artyq bólikke joǵary mólsherleme qoldanylady, — dedi ol.
Qandaı múlik qymbat sanalady
Joǵary salyq salynatyn sanatqa quny belgilengen shekten asatyn myna múlik túrleri kiredi:
* quny 18 000 AEK-ten (shamamen 77,8 mln teńge) asatyn avtomobılder;
* quny 24 000 AEK-ten (shamamen 103,8 mln teńge) asatyn ıahtalar men áýe kemeleri;
* qymbat alkogol jáne temeki ónimderi.
Memlekettik kirister komıtetiniń málimetinshe, salyq esepteý kezinde naryqtyq baǵa emes, memlekettik baǵalaý quny negizge alynady. Baǵalaýdy ýákiletti organ júrgizedi.
Bul rette turǵyn úıdiń aýdany, qurylys sıpattamalary, ornalasqan jeri jáne tozý deńgeıi sııaqty kórsetkishter eskeriledi.
Eger azamattyń birneshe jyljymaıtyn múlki bolsa, olardyń quny jıyntyqtalyp esepteledi. Keıin salyq árbir obektige proportsıonaldy túrde bólinedi.
Tólem merzimi jáne jaýapkershilik
Memlekettik kirister komıteti salyqty 1 qazanǵa deıin tóleý qajettigin eske saldy. Belgilengen merzimnen keshiktirilgen jaǵdaıda bereshek týyndap, ósimpul esepteledi.
Odan keıin salyq tóleýshige habarlama jiberiledi. Tólem júrgizilmegen jaǵdaıda bank shottary buǵattalýy múmkin, sondaı-aq bereshek májbúrli óndirip alý tártibine beriledi.
Aıta keteıik, buǵan deıin salyq júıesindegi 14 aqparattyq platforma 5 negizgi júıege biriktirilgeni jaıly habarladyq.
