Elde salyq qaryzy bar kompanııalardyń basshysyn aýystyrýǵa shekteý qoıylady
ASTANA. KAZINFORM — Qazaqstanda 1 qarashadan bastap salyq bereshegi bar kompanııalardyń basshysyn nemese zańdy mekenjaıyn aýystyrýǵa shekteý engiziledi. Bul týraly Memlekettik kirister komıtetiniń Bereshekpen jumys basqarmasynyń basshysy Qaısar Aryn málimdedi.
Onyń aıtýynsha, jańa talap salyq qaryzy 45 aılyq eseptik kórsetkishten, ıaǵnı 194 625 teńgeden asqan jáne bereshegin tórt aıdan astam ýaqyt ótemegen kásiporyndarǵa qatysty.
Mundaı ózgeris keıbir kompanııalardyń salyq tóleýden jaltarý áreketterine baılanysty qabyldanǵan.
— Keıbir kásiporyndar qaryzyn óteı almaǵan kezde basshysyn basqa adamǵa aýystyryp jiberedi. Keıde ol adamnyń turaqty mekenjaıy bolmaıdy nemese bas bostandyǵynan aıyrý ornynda otyrǵan adam bolyp shyǵady. Mundaı áreketter bereshekti óndirip alýǵa kedergi keltiredi, — dedi Qaısar Aryn.
Basqarma basshysynyń túsindirýinshe, osyndaı jaǵdaılardyń aldyn alý úshin zańdy tulǵalardy tirkeý jáne qaıta tirkeý tártibine ózgerister engizilgen.
Endi salyq bereshegi belgilengen mólsherden asyp, tórt aıdan astam ýaqyt ótelmese, kompanııa basshysyn nemese zańdy mekenjaıyn ózgertýge shekteý qoıylady.
Jańa talap 2026 jylǵy 1 qarashadan bastap kúshine enedi. Buǵan deıin 20 qazanǵa deıin qandaı salyqtar men mindetti tólemderdi tóleý qajet ekenin jazǵan edik.
