Elde sábı ólimi byltyrǵy jylmen salystyrǵanda 20,2%-ǵa tómendedi — Úkimet
ASTANA. KAZINFORM — Memleket basshysy Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyndaǵy tapsyrmalary sheńberinde Úkimet, onyń ishinde Densaýlyq saqtaý mınıstrligi medıtsınalyq kómek sapasyn arttyrý, ınfraqurylymdy damytý, kadrlyq áleýetti nyǵaıtý jáne densaýlyq saqtaý júıesin tsıfrlandyrý boıynsha jumystardy jalǵastyryp jatyr.
Qabyldanyp jatqan sharalardyń nátıjesinde halyq densaýlyǵynyń negizgi kórsetkishteri boıynsha turaqty oń dınamıka baıqalýda. Osy jyldyń 1 qazanyndaǵy kórsetkishterge sáıkes, jalpy ólim-jitim 2,7%-ǵa, al sábı ólimi byltyrǵy sáıkes kezeńmen salystyrǵanda 20,2%-ǵa tómendegen.
Úsh jylda 600-den astam medıtsınalyq nysan salyndy
Elimizde medıtsınalyq ınfraqurylym qarqyndy damyp keledi. Aýrýhanalar, emhanalar men feldsherlik-akýsherlik pýnktiler salynyp, jańartylyp jatyr. Sońǵy úsh jylda 633 densaýlyq saqtaý nysany paıdalanýǵa berildi, olardyń qatarynda Astanadaǵy Ulttyq onkologııalyq ortalyq pen Shuǵyl medıtsına ortalyǵy, sondaı-aq Almatydaǵy Infektsııalyq aýrýlar ortalyǵy bar.
Bıyl jyl sońyna deıin Shyǵys Qazaqstan oblysyndaǵy Rıdder qalasynda kópbeıindi aýrýhananyń, Óskemen qalasynda Gematologııa ortalyǵynyń jáne Mańǵystaý oblysyndaǵy Aqtaý qalasynda jedel járdem stansasynyń qurylysyn aıaqtaý josparlanǵan.
Budan bólek, «Aýylda densaýlyq saqtaýdy jańǵyrtý» ulttyq jobasy júzege asyrylyp jatyr. Onyń aıasynda búginde 601 medıtsınalyq-sanıtarııalyq alǵashqy kómek nysany salyndy. Bıyl taǵy 54 nysan qurylysyn aıaqtaý josparlanǵan. Sonymen qatar 32 aýdandyq aýrýhanany kópbeıindi ortalyq aýdandyq aýrýhana deńgeıine deıin jańǵyrtý jumystary jalǵasýda. Sonyń ishinde Ulttyq joba bastalǵaly Qaraǵandy oblysynyń Temirtaý jáne Balqash qalalaryndaǵy, Ulytaý oblysynyń Jańaarqa aýdanyndaǵy ortalyq aýrýhanalar, Abaı oblysynyń Úrjar aýdandyq ortalyq aýrýhanasy, sondaı-aq Jambyl oblysyndaǵy Shý, Merki jáne Talas aýdandyq ortalyq aýrýhanalary men Mańǵystaý oblysyndaǵy Beıneý aýdandyq ortalyq aýrýhanasy — barlyǵy segiz aýrýhana kópbeıindi etip qaıta uıymdastyryldy.
Qańtar-qazan aılary aralyǵynda densaýlyq saqtaý salasyndaǵy negizgi kapıtalǵa salynǵan ınvestıtsııa kólemi jospardaǵy 241 mlrd teńgeniń 214,8 mlrd teńgesin nemese 89%-yn qurady.
Dese de TMD elderiniń ishinde sábı óliminiń tirkelýi boıynsha Qazaqstan aldyńǵy qatardan túspeı keledi. Sábıdiń dúnıege kelý derekteri óskenimen, olardyń shetinep ketý kórinisteri kóbeıip kele jatqany alańdatady. Statıstıkaǵa shaqsaq, bala týý kórsetkishi eki paıyzǵa artsa, tıisinshe sábı ólimi bir paıyzǵa kóbeıgen. Bul derek eldiń demografııalyq ahýalyn kórsetse kerek.