Elde irimshik zaýyty salynyp, spýtnık óndirisi jolǵa qoıylýy múmkin
ASTANA. KAZINFORM — QR Premer-mınıstri Oljas Bektenov Shymkent qalasynda ótip jatqan IX Kazakhstan Global Investment Roundtable aıasynda Aksa Energy, Carlsberg Kazakhstan, Solico Group jáne CONTEC halyqaralyq kompanııalarynyń basshylarymen birqatar ekijaqty kezdesý ótkizdi, dep habarlaıdy Úkimettiń baspasóz qyzmeti.
Kezdesýler barysynda energetıka, agroónerkásip kesheni, tamaq ónerkásibi jáne ǵarysh salalary boıynsha qoldanystaǵy jáne keleshegi zor birlesken ınvestıtsııalyq jobalar qaraldy. Prezıdent Qasym-Jomart Toqaev qoıǵan mindetterge sáıkes yntymaqtastyqty keńeıtý, óńdeý óndiristerin damytý jáne jańa tehnologııalar engizý múmkindikteri talqylandy. Qazaqstandyq qamtý úlesin arttyrý máselesine erekshe nazar aýdaryldy.
Aksa Energy kompanııasynyń bas dırektory ári atqarýshy komıtetiniń tóraǵasy Nadjı Agbalmen kezdesýde yntymaqtastyq nátıjeleri jáne Qazaqstanda jańa energetıkalyq jobalardy júzege asyrý perspektıvalary talqylandy. Atap aıtqanda, Qyzylordada quny 215 mlrd teńge bolatyn bý-gaz qondyrǵysynyń sátti iske qosylǵany atap ótildi. Elektr qýaty 240 MVt, jylý qýaty saǵatyna 277 Gkal bolatyn stansa bıylǵy maýsym aıynda kommertsııalyq paıdalanýǵa berildi. Nysan óńirdiń elektr energııasy men jylýǵa degen ósip kele jatqan qajettiligin qamtamasyz etedi. Sondaı-aq kompanııanyń Qazaqstandaǵy ınvestıtsııalyq josparlary qaraldy.
Carlsberg Kazakhstan bas dırektory Vıacheslav Maltsevpen kezdesý barysynda tamaq ónerkásibin damytý, óndiristi lokalızatsııalaý jáne eksportty keńeıtý máseleleri talqylandy. Carlsberg Kazakhstan Qazaqstandaǵy PepsiCo ónimderiniń resmı dıstrıbıýtory boldy. Eki kompanııanyń yntymaqtastyǵy aıasynda osy jyldyń 1 qazanynda Almaty oblysynda quny $344 mln bolatyn alkogolsiz sýsyndar shyǵaratyn zaýyt iske qosyldy. Kásiporyn ónimderi ishki naryqqa da, eksporttyq jetkizilimderge de arnalǵan. 230 turaqty jumys orny ashyldy. Búgingi tańda Carlsberg Kazakhstan qyzmetindegi qazaqstandyq qamtý úlesi 71,5%-dy quraıdy. Otandyq shıkizat jáne qaptaý materıaldaryn jetkizýshilermen yntymaqtastyqty keńeıtýge nazar aýdaryldy.
Solico Group kompanııasynyń TMD elderindegi bas dırektory ári dırektorlar keńesiniń múshesi Alıreza Mohammad Rahımımen kelissózder aıasynda Almaty oblysynda irimshik óndiretin zaýyt qurylysynyń barysy talqylandy. Jobaǵa salynatyn ınvestıtsııa kólemi shamamen 45 mlrd teńgeni quraıdy, kásiporynnyń óndiristik qýaty jylyna 41 myń tonnaǵa jetedi. 450-ge jýyq turaqty jumys ornyn qurý josparlanyp otyr. Qazirgi ýaqytta nysanda qurylys-montaj jumystary jalǵasýda, kásiporyndy 2029 jyly paıdalanýǵa berý josparlanǵan. Sondaı-aq Qazaqstannyń agrarlyq óńirlerinde jańa óńdeý óndiristerin iske qosý perspektıvalary da qaraldy. Bul otandyq ónim eksportynyń keńeıýine eleýli serpin beredi.
— CONTEC kompanııasynyń negizin qalaýshy ári bas dırektory Lı Sonhımen kezdesýde ǵarysh salasyndaǵy yntymaqtastyqty keńeıtý perspektıvalary talqylandy. Qazaqstanda spýtnıkter men olardyń quramdas bólikterin birlesip óndirý, jerústi ınfraqurylymyn damytý jáne jekelegen óndiristik protsesterdi lokalızatsııalaý múmkindikteri qarastyryldy. Spýtnıktik derekterdi óńdeýde jasandy ıntellekt tehnologııalaryn engizýge, sondaı-aq otandyq mamandardy daıarlaý salasyndaǵy ózara is-qımylǵa jáne birlesken ónimdi sheteldik naryqtarǵa shyǵarý perspektıvalaryna erekshe nazar aýdaryldy, — delingen habarlamada.
Qazaqstan jańa ınvestıtsııalar tartýǵa jáne qosylǵan quny joǵary ónim óndirý jobalaryn júzege asyrýǵa múddeli. Premer-mınıstr salalyq mınıstrlikter men jaýapty uıymdarǵa ınvestıtsııalyq jobalarǵa qajetti qoldaý kórsetýdi tapsyrdy.
Osyǵan deıin Shymkentte 4,8 mlrd dollarlyq ınvestıtsııalyq kelisimder jasalǵanyn jazǵanbyz.
