Elde resmı túrde jańa kásibı mereke belgilendi

ASTANA. KAZINFORM — Bıyldan bastap 29 qazan resmı túrde kásibı mereke— Qazaqstan kásipkerleri kúni bolyp belgilendi. Eńbek jáne halyqty áleýmettik qorǵaý mınıstrliginiń tıisti buıryǵyna 2025 jylǵy 30 shildede qol qoıyldy. Bul týraly Ekonomıka mınıstrliginiń baspasóz qyzmeti habarlady. 

Bul kúndi tańdaý mańyzdy tarıhı oqıǵaǵa baılanysty. 2015 jylǵy 29 qazanda bıznesti qoldaý jónindegi biryńǵaı memlekettik saıasattyń bazalyq qaǵıdattaryn qalyptastyra otyryp, kásipkerlik, ınvestıtsııa, básekelestik jáne memlekettik baqylaý salasyndaǵy negizgi zańnamalyq aktilerdi shoǵyrlandyrǵan Qazaqstan Respýblıkasynyń Kásipkerlik kodeksi qabyldandy.

Búginde elimizde 2 mıllıon 300 myńnan asa bıznes sýbektisi tirkelgen.

Kásipkerlerdi qoldaý ekonomıkalyq saıasattyń basymdyǵynyń biri bolyp qala beredi. Jyl basynan beri 288 mıllıard teńgege 2 myńnan astam joba sýbsıdııalanyp, 61 mıllıardqa 737 jobaǵa kepildik berildi. Toǵyz myńǵa jýyq kásipker oqytyldy.

2025 jyly ShOB-ty qoldaýǵa 270 mıllıard teńgeden astam qarajat bólý josparlanýda. 12,6% mólsherlememen «Órleý» jeńildikpen kredıtteý baǵdarlamasy da iske qosyldy. Qoldaýdyń jalpy kólemi 750 mıllıard teńge. Onyń ishinde 300 mıllıardy — «Damý» qarajaty, 450 mıllıardy — bank resýrsy. Qazirdiń ózinde 200 mıllıard teńgege 400-ge jýyq joba qarjylandyryldy.

Bıznestiń habardarlyǵyn arttyrý maqsatynda «Bıznestiń tsıfrlyq kartasy» jobasy iske asyrylyp jatyr. 100-den astam qoldaý sharasy bar tizilim bekitildi. «EGov Business» qosymshasymen «Báıterek» holdıngin qoldaý sharalaryn qamtıtyn «Bgov» AJ ıntegratsııasy aıaqtalyp, ony 71 myń paıdalanýshy 2,3 mln ret paıdalandy.

Aıta ketelik búgin — Áýe qorǵanysy kúshteriniń kásibı merekesi.