Elde radıoaktıvti qaldyqtardyń kólemi qansha

ASTANA. KAZINFORM — Radıoaktıvti qaldyqtarǵa qatysty barlyq máselelerdi retteıtin Ulttyq operator qurylady. Bul týraly QR Atom energııasy jónindegi agenttigi tóraǵasynyń orynbasary Ǵumar Serǵazın málim etti.

Aıta keteıik, búgin Parlament Májilisinde «Radıoaktıvti qaldyqtarmen jumys isteý týraly» zań jobasy men oǵan ilespe qujattar tanystyryldy.

Osy oraıda radıoaktıvti qaldyqtarmen jumys isteýdiń jalpy sharttary belgilenedi, radıoaktıvti qaldyqtarmen jumys isteý jónindegi ulttyq operator ınstıtýty engiziledi.

- Qazirgi kezde Qazaqstanda shamamen 293 mln tekshe metr radıoaktıvti qaldyq bar, onyń negizgi úlesi - 290 mıllıony tómen radıoaktıvti qaldyqtar sanatynda. Semeı synaq polıgonynda 237 mıllıony jınaqtalǵan. Buǵan lastanǵan topyraqtyń alańnan shyǵarylǵan kólemin jatqyzýǵa bolady. Basym bóligi, ıaǵnı 290 mıllıony tómen deńgeıdegi radıoaktıvti qaldyqtar, - dedi Ǵ. Serǵazın.

Onyń aıtýynsha, qalǵan ortasha jáne joǵary aktıvti deńgeıdigi qaldyqtar Ulttyq ıadrolyq ortalyq, ıAdrolyq fızıka ınstıtýty, Úlbi zaýyty, sondaı-aq Stepnogor taý-ken-hımııa kombınaty kásiporyndarynan, «Qoshqar Ata» oıpatynan shyqqan.

- Zań jobasy aıasynda radıoaktıvti qaldyqtarǵa qatysty barlyq máselelerdi retteıtin Ulttyq operatordy qurýǵa múmkindik beredi. Búginde qaldyqtardy kómý alańdaryna qatysty álemdik tájirıbeniń de álsiz ekenin kórip otyrmyz. Birneshe elde kómetin oryndar bar. Májiliste qaralyp jatqan zań jobasynda qaldyqtardy kómý alańdaryn qurý qarastyrylǵan. Bul oryndar Úkimet qaýlysymen anyqtalady. Ulttyq operator qurylys pen radıatsııalyq qaýipsizdikke, onyń ishinde bolashaqta barlyq radıoaktıvti qaldyqtardy baqylaýǵa, esep berýge jáne Tizilimdi júrgizýge jaýapty bolady, - dedi agenttik tóraǵasynyń orynbasary.

Osyǵan deıin Qazaqstanda sheteldik radıoaktıvti qaldyqtardy kómýge tyıym salynatyny týraly jazdyq.