Elde psıhologııalyq qyzmetke qoıylatyn talaptar aıqyndaldy
ASTANA. KAZINFORM — Búgin Parlament Májilisiniń jalpy otyrysynda «Psıhologııalyq qyzmet týraly» Zańy ekinshi oqylymda qaralyp, qabyldandy.
Bul qujat 2026 jylǵy 8 sáýirde Qazaqstan Respýblıkasy Parlamenti Májilisiniń jalpy otyrysynda birinshi oqylymda maquldandy.
Májilistiń Áleýmettik-mádenı damý komıtetiniń málimetine qaraǵanda, zańda myna normalar eskerilgen:
- osy saladaǵy memlekettik saıasattyń maqsattaryn, qaǵıdattary men mindetterin belgileýdi qosa alǵanda, psıhologııalyq qyzmetti keshendi quqyqtyq retteýdi qalyptastyrý;
- qupııalylyqty qamtamasyz etýdi, habardar etilgen kelisim alýdy, kásiptik jáne ádep standarttaryn saqtaýdy qosa alǵanda, psıhologtar men psıhologııalyq kómek alýshylardyń quqyqtary men mindetterin bekitý;
- psıhologtardyń biryńǵaı memlekettik tizilimin engizý, oǵan kásibı qyzmetti júzege asyrý úshin mindetti shart bolyp sanalady;
- psıhologtar tarapynan dári-dármekpen emdeýge tyıym salýdy qosa alǵanda, psıhologııalyq kómek pen medıtsınalyq qyzmettiń arajigin ajyratý, bul halyqaralyq praktıkaǵa sáıkes keledi jáne psıhologııalyq kómek kórsetý kezinde azamattardyń qaýipsizdigin arttyrady;
- psıholog qyzmetiniń quzyretine, biliktiligine jáne mazmunyna qoıylatyn talaptardy aıqyndaıtyn kásiptik standartty engizý, bul kórsetiletin qyzmetter sapasynyń biryńǵaı deńgeıin qoldaýǵa múmkindik beredi;
- psıhologııalyq kómek alýshy úshin eriktilikti, jazbasha habardar etilgen kelisimdi jáne aqparattyń qoljetimdiligin qosa alǵanda, psıhologııalyq kómek kórsetý nysandaryn (kúndizgi, qashyqtan, aralas) jáne ony berý sharttaryn bekitý.
Sonymen qatar, jumys barysynda depýtattar zań jobasyn tıisti normalarmen tolyqtyrdy. Osy oraıda psıhologııalyq qyzmet sýbektilerine qoıylatyn tıisti talaptardy aıqyndaı otyryp, onlaın-platformalar arqyly psıhologııalyq kómek kórsetý máseleleri retteldi. Munymen qosa, psıhologtyń Ádep kodeksin saqtaý boıynsha talaptar engizildi.
- Adamnyń sanasyna áser etetin psıhıkaǵa belsendi áser etetin zattardy nemese psıhıkaǵa belsendi áser etetin ádisterdi qoldanýǵa tyıym salyndy, - delingen komıtet aqparatynda.
