Elde PET/KT zertteýin kútý ýaqyty úsh aıdan eki aptaǵa deıin qysqardy
ASTANA. KAZINFORM — 2025 jyly Qazaqstannyń densaýlyq saqtaý júıesinde 215 mıllıonnan astam medıtsınalyq qyzmet kórsetildi. Onyń ishinde 190,8 mıllıony nemese 88,6%-y elektrondyq formatta usynyldy.
Búginde mıllıondaǵan qazaqstandyq densaýlyq saqtaý salasyndaǵy tsıfrlyq servısterdi paıdalanyp keledi. Elektrondyq medıtsınalyq anyqtamalar, dárigerdiń qabyldaýyna onlaın jazylý jáne zamanaýı tsıfrlyq sheshimder medıtsınalyq kómekti alý protsesin azamattar úshin yńǵaıly, jyldam ári qoljetimdi etýde.
Tsıfrlandyrýdyń mańyzdy nátıjeleriniń biri — medıtsınalyq qujattardy elektrondyq formatqa kóshirý boldy. Qazirgi tańda medıtsınalyq anyqtamalardyń 12 túri tsıfrlandyryldy, onyń beseýi tek onlaın rásimdeledi. 2025 jyly azamattarǵa 8,5 mıllıonnan astam elektrondyq medıtsınalyq anyqtama berildi. Bul ótken jylmen salystyrǵanda 2,2 ese kóp.
— El turǵyndary dárigerdiń qabyldaýyna tsıfrlyq servıster arqyly jazylý múmkindigin barǵan saıyn jıi paıdalanyp jatyr. 2025 jyly onlaın jazylý qyzmetin 5,6 mıllıon azamat qoldandy. Bul mamandardyń qabyldaýyn tirkeý bólimine júginbeı-aq aldyn ala josparlaýǵa múmkindik beredi.
Tsıfrlyq sheshimder mańyzdy dıagnostıkalyq zertteýlerdi kútý merzimin de qysqartýǵa yqpal etýde. Máselen, PET/KT zertteýin kútý ýaqyty úsh aıdan eki aptaǵa deıin qysqardy, — delingen habarlamada.
Tsıfrlyq densaýlyq saqtaýdy damytýdyń kelesi kezeńi densaýlyqqa tónetin qaýipterdi erte anyqtaý múmkindikterin keńeıtýge baǵyttalady. 2026 jyldan bastap halyqtyń negizgi toptaryn tsıfrlyq súıemeldeýdi qamtamasyz etý josparlanyp otyr. Olardyń qatarynda 18 jasqa deıingi 7 mıllıonnan astam bala, reprodýktıvtik jastaǵy shamamen 5 mıllıon áıel jáne 400 myń júkti áıel bar.
Bul yqtımal qaýip-qaterlerdi ýaqtyly anyqtaýǵa, profılaktıkalyq jumysty kúsheıtýge jáne medıtsınalyq baqylaýdyń sapasyn arttyrýǵa múmkindik beredi.
Aldaǵy ýaqytta onlaın brondaý qaǵıdaty boıynsha dárigerlerdiń biryńǵaı qabyldaý kestesin, e-Health portalyn jáne azamattarǵa, medıtsına qyzmetkerleri men medıtsınalyq uıymdarǵa arnalǵan mobıldik qosymshany iske qosý josparlanyp otyr. Sonymen qatar keri baılanys tetikteri men medıtsınalyq qyzmettiń naqty kórsetilgenin rastaý quraldary odan ári damytylady.
Aıta ketelik elde emhanaǵa qaralý tártibi ózgergeni týraly jazǵan edik.
