Elde pedagogıkalyq mamandyqtar boıynsha oqýǵa túsý talaby kúsheıedi
ASTANA. KAZINFORM — Pedagogıkalyq mamandyqtarǵa túsýdegi aınalma joldarǵa tosqaýyl qoıylady. Bul týraly Májilistiń jalpy otyrysynda bilim berý máseleleri boıynsha ózgeris engizýdi talqylaý kezinde depýtat Ashat Aımaǵambetov málim etti.
— 2020 jyldan bastap mańyzdy talap engizgen edik. Pedagogıkalyq mamandyqqa túsý úshin UBT-dan kem degende 75 ball jınaý jáne ýnıversıtette qosymsha arnaıy emtıhan tapsyrý kerek degen talap kúshine endi. Bul muǵalimdikke eń úzdik túlekter kelýi úshin jasalǵan sheshim bolatyn. Rasynda, qazir muǵalimdikke túsetinderdiń ortasha upaıy ósip, 100 ball shamasynda. Tipti, grantqa keıbir baǵyttar boıynsha 120 balmen túse almaı jatyr. Árıne, osyndaı suranystyń artýy qýanarlyq jaǵdaı, — dedi Ashat Aımaǵambetov.
Depýtat osy máselede aınalma jol taýyp alǵandardy synǵa aldy.
— Keıbiri aınalma jol taýyp alǵan. Shema óte ońaı. Talapker kez kelgen sheteldik oqý ornyna túsip, bir semestr oqyp, odan keıin Qazaqstandaǵy pedagogıkalyq ýnıversıtetke aýysady. Al oǵan qoıylatyn talaptar talapkerge emes, aýysýshy stýdentke qoıylatyn talaptarmen birdeı bolady. Bul turǵyda UBT men arnaıy emtıhan kerek bolmaı qalady. Osylaısha, keıbir adamdar bazalyq talaptarǵa saı kelmese de, muǵalimdikke kelip jatyr. Endi buǵan jol bermeımiz. Osydan keıin pedagog mamandyǵyna sheteldik ýnıversıtetten aýysqan kezde de UBT men arnaıy emtıhan sertıfıkaty mindetti bolady, — dedi ol.
Eske salsaq, byltyr kúzden bastap pedagogıkalyq mamandyqta oqıtyn stýdentterdiń stıpendııasy 84 myń teńge boldy.
