Elde pedagogıkalyq bilim berýdiń jańa modelin ázirleý bastaldy
ASTANA. KAZINFORM — Premer-mınıstriniń orynbasary — mádenıet jáne aqparat mınıstri Aıda Balaevanyń tóraǵalyǵymen ótken jıynda 2026-2028 jyldarǵa arnalǵan mektepke deıingi jáne bastaýysh bilim berýdi damytýdyń keshendi josparynyń jobasy, sondaı-aq pedagogıkalyq joǵary oqý oryndarynyń jumysyn jetildirý máselesi talqylandy. Bul týraly Úkimettiń baspasóz qyzmeti habarlady.
Jıyn barysynda qujatty ázirleý jumystarynyń barysy qaralyp, qatysýshylardyń baıandamalary tyńdaldy.
Oqý-aǵartý mınıstri Juldyz Súleımenova mektepke deıingi jáne bastaýysh bilim berý júıesin jańǵyrtýdyń negizgi baǵyttaryn tanystyrdy.
Aıda Balaeva mektepke deıingi jáne bastaýysh bilim berý balanyń tulǵa retinde qalyptasýynyń berik negizin qalaıtynyn, ári onyń bolashaqtaǵy damýyna tikeleı áser etetin mańyzdy kezeń ekenin atap ótti. Sonymen qatar pedagog kadrlardy daıarlaý júıesin damytý máselesine erekshe nazar aýdaryldy.
Jıynda tárbıeshi mamandyǵynyń bedelin arttyrý, mektepke deıingi bilim berý uıymdaryn qarjylandyrý tetikterin jetildirý jáne Memleket basshysy aıqyndaǵan qundylyqtarǵa negizdelgen pedagog daıarlaýdyń jańa úlgisin qalyptastyrý máseleleri sóz boldy.
Ǵylym jáne joǵary bilim mınıstrligine pedagogıkalyq bilim berýdiń jańa modelin ázirleý mindeti júkteldi. Bul baǵytta talapkerlerdi irikteý tetikterin jetildirý jáne pedagogıkalyq joǵary oqý oryndaryna túsýshiler úshin UBT-nyń jańa formatyn engizý kózdelip otyr.
Budan bólek, pedagogterdi daıarlaý mazmuny men ádisterin jańartý, tájirıbege negizdelgen oqytýdy kúsheıtý, tsıfrlyq sheshimderdi keńinen engizý jáne professor-oqytýshylar quramynyń kásibı áleýetin arttyrý strategııalyq basymdyqtar retinde ataldy.
Usynylǵan bastamalar men jańashyldyqtar aldaǵy ýaqytta óńirlerde sarapshylar men pedagogıkalyq joǵary oqý oryndary ókilderiniń qatysýymen jan-jaqty talqylanady.
Aıta ketelik bıyl 96 mektepti paıdalanýǵa berý josparlanyp otyr.
