Endi jyljymaıtyn múlik mámilesin nysan ornalasqan jerdegi notarıýs kýálandyrady
ASTANA. KAZINFORM — Qazaqstanda jyljymaıtyn múlikke qatysty mámilelerdi notarıattyq kýálandyrý tártibi ózgerdi. Jańa talap 8 qyrkúıekten bastap kúshine endi.
Endi notarıýsty múlik ornalasqan jerden tańdaý kerek
Ádilet mınıstrliginiń habarlaýynsha, satyp alý-satý, syıǵa tartý, aıyrbastaý, kepilge qoıý jáne jyljymaıtyn múlikti ıelikten shyǵarýǵa baılanysty ózge de memlekettik tirkeýge jatatyn mámileler endi múlik ornalasqan jerdegi notarıýs arqyly rásimdeledi.
Mınıstrlik bul ózgeris jyljymaıtyn múlikpen jasalatyn mámilelerdi rásimdeý tártibin júıeleýge, sondaı-aq mámileni notarıattyq kýálandyrý men quqyqtardy memlekettik tirkeý arasyndaǵy baılanysty naqtylaýǵa baǵyttalǵanyn atap ótti.
— Aýmaqtyq qaǵıdat jyljymaıtyn múlik obektisi, mámileni notarıattyq kýálandyrý jáne quqyqtardy keıinnen memlekettik tirkeý arasyndaǵy ózara baılanysty naqty ári júıeli túrde qalyptastyrýǵa múmkindik beredi, — delingen mınıstrlik habarlamasynda.
Basqa qalada júrgender ne isteıdi?
Jańa tártip azamattardyń basqa óńirde júrip óz múlkine bılik etý quqyǵyn shektemeıdi.
Mysaly, páter Astanada ornalassa, al onyń ıesi Almatyda bolsa, ol óz atynan mámile jasaý úshin basqa adamǵa senimhat bere alady. Bul jaǵdaıda ókili Astanadaǵy notarıýsqa baryp, mámileni rásimdeıdi.
Osylaısha, azamattar burynǵydaı jyljymaıtyn múlkin sata, syıǵa tarta, aıyrbastaı nemese kepilge qoıa alady. Ózgergeni — tek mámileni notarıattyq kýálandyrý orny. Endi ol múlik ornalasqan jerge baılanysty anyqtalady.
Ádilet mınıstrliginiń málimetinshe, jańa talap tek jyljymaıtyn múlikke qatysty mámilelerge qoldanylady jáne basqa notarıattyq áreketterdi jasaý tártibine áser etpeıdi.
Eske salaıyq, buǵan deıin 8 qyrkúıekten bastap Qazaqstanda jyljymaıtyn múlikke qatysty mámilelerdi notarıaldy kýálandyrý tártibi ózgergenin jazǵanbyz.
«Qazaqstan tutynýshylar ulttyq lıgasy» RQB prezıdentiniń orynbasary Vasılıı Romanovskıı múlik boıynsha mámilede qandaı qujattarǵa nazar aýdarý ekenin aıtyp bergen edi.
