Elde pasportty kimder tegin ala alady
QYZYLORDA. KAZINFORM — Bıyl Qazaqstan azamattarynyń jeke basyn kýálandyratyn qujattardy rásimdeý tártibi ózgerdi. Sonyń biri — jeke kýálikti alǵash ret alý jáne onyń qoldanylý merzimi aıaqtalǵannan keıin aýystyrý kezinde memlekettik bajdyń alynbaýy.
Alaıda mamandar bul jeńildik jeke kýálikti joǵaltyp alǵanda, búldirgende nemese derekterdi ózgertkende qoldanylmaıtynyn atap ótti.
Mundaı jaǵdaıda qoldanystaǵy tártip saqtalyp, baj salyǵy tólenedi.
Al pasportty rásimdeý jalpy jaǵdaıda aqyly bolǵanymen, birqatar sanattaǵy azamat bul tólemnen bosatylady.
— Qazaqstan azamatynyń pasporty jeke kýálik sııaqty barlyǵyna birdeı tegin berilmeıdi. Pasporttyń 24 bettik nusqasy 16 jasqa deıingi balalarǵa arnalǵan. Bıyl onyń quny 4 aılyq eseptik kórsetkish, 36 bettik pasport 8 aılyq eseptik kórsetkish, al 48 bettik qujat 12 aılyq eseptik kórsetkish bolyp belgilengen.
Sonymen birge zańda belgilengen jeńildikke ıe azamattar pasport úshin memlekettik baj tólemeıdi. Olardyń qatarynda Keńes Odaǵynyń batyrlary, Sotsıalıstik Eńbek Erleri, úsh dárejeli «Dańq» jáne «Eńbek dańqy», «Altyn Qyran», «Otan» ordenderiniń ıegerleri, «Halyq Qaharmany», «Qazaqstannyń Eńbek Eri» ataǵyn alǵandar, sondaı-aq «Batyr Ana» ataǵyna ıe jáne «Altyn alqa», «Kúmis alqa» tósbelgilerimen marapattalǵan kópbalaly analar, Ekinshi dúnıejúzilik soǵys ardagerleri jáne olarǵa teńestirilgen adamdar bar. Sonymen qatar bul sanatqa múgedektigi bar adamdar, bala kezinen múgedektigi bar adamnyń nemese múgedektigi bar balanyń ata-anasynyń biri, qarttar men múgedektigi bar adamdarǵa arnalǵan medıtsınalyq-áleýmettik mekemelerde turatyn azamattar, memlekettik balalar úılerinde jáne ınternattarda turatyn jetim, ata-anasynyń qamqorlyǵynsyz qalǵan balalar, sondaı-aq Chernobyl apatynan zardap shekken azamattar jatady, — dedi «Azamattarǵa arnalǵan úkimet» MK Ke AQ Qyzylorda oblysy boıynsha fılıalynyń front- ofısterdi úılestirý basqarmasynyń basshysy Gúlnaz Badyraqova.
Qujattardy rásimdeý úshin azamattar turǵylyqty jerine qaramastan HQO-ǵa júgine alady. Jalpy tártippen pasport pen jeke kýálik 15 jumys kúninen keshiktirilmeı daıyndalady.
Buǵan deıin biz Jambyl oblysynda tumaýǵa qarsy ekpeni kimder tegin alatynyn jazǵan edik.
