Elde ósimdik maıyn óndirý 24%-ǵa ósti

ASTANA. KAZINFORM — Qazaqstanda maıly daqyldardy qaıta óńdeý kóleminiń turaqty ósýi jalǵasyp jatyr. 

2025 jylǵy qańtar–shilde qorytyndysy boıynsha ósimdik maıyn óndirý ótken jyldyń sáıkes kezeńimen salystyrǵanda 24%-ǵa artyp, 420,5 myń tonnadan 521,2 myń tonnaǵa jetti. Onyń ishinde kúnbaǵys maıynyń óndirisi 457,7 myń tonnany qurap, ótken jyl deńgeıinen 24,5%-ǵa joǵary boldy (367,8 myń tonna).

Jalpy, 2024 jyly elde 753 myń tonna ósimdik maıy óndirildi. Bul 2023 jylmen salystyrǵanda (672,1 myń tonna) 12%-ǵa artyq. Kúnbaǵys maıynyń óndirisi 18,3%-ǵa ósti.

Búginde elimizde jylyna 4,7 mln tonna maıly daqyl tuqymyn óńdeýge qaýqarly 88 qaıta óńdeý kásiporny jumys isteıdi. Ulttyq statıstıka bıýrosynyń derekterine sáıkes, óndiristik qýattardyń ortasha júktemesi shamamen 35%. Bul óńdeý kólemin odan ári arttyrýǵa zor áleýet bar ekenin kórsetedi.

Eksporttyq kórsetkishter de oń dınamıkany kórsetýde. 2024 jyly ósimdik maılary eksporty 29%-ǵa artty. Negizgi eksport baǵyttary: Qytaı Halyq Respýblıkasy – jalpy kólemniń 42,4%-y, Ózbekstan – 35,4%, Tájikstan – 12,7%, Aýǵanstan – 3,2%, Qyrǵyzstan – 1,4%, Latvııa jáne Túrikmenstan – 1,8%.

Óndiristiń ósýi maıly daqyldar egis alańdarynyń ulǵaıýynyń arqasynda qamtamasyz etildi. 2025 jyly olardyń kólemi 36%-ǵa (+1,055 mln ga) artty. Eń kóp ósim myna daqyldar boıynsha baıqaldy: kúnbaǵys – +481 myń ga (el tarıhyndaǵy rekordtyq egis alqaby), zyǵyr – +376 myń ga, raps – +173 myń ga.

Kúnbaǵys egisin ulǵaıtý boıynsha kóshbasshylar Pavlodar oblysy (+136 myń ga), Qostanaı oblysy (+109 myń ga), Soltústik Qazaqstan oblysy (+65 myń ga) jáne Aqmola oblysy (+46 myń ga) boldy.

Aýyl sharýashylyǵy taýar óndirýshileri maıly daqyldardy anaǵurlym rentabeldi daqyl retinde kóbirek tańdaı bastady. Bul aýyl sharýashylyǵy óndirisin ártaraptandyrý baǵytynyń ózektiligi men tıimdiligin dáleldeıdi. 

Aıta ketelik ósimdik maıyn tańbalaý boıynsha pılottyq joba bastalatyny týraly jazǵan edik.