Qazaqstandyqtardyń ortasha tabysy qansha ekeni belgili boldy

ASTANA. KAZINFORM —  Jalaqynyń medıanalyq máni (jalaqy qatarynyń ortalyq deńgeıi) 2024 jylǵy IV toqsanda baǵalaý boıynsha 308 717 teńge boldy.

- Shaǵyn kásiporyndardy esepke almaǵandaǵy ataýly jalaqynyń ortasha máni 2024 jylǵy IV toqsanda 434 982 teńge boldy. 2023 jyldyń tıisti toqsanyna qaraǵanda ósim 10,5%-dy, naqty mánde – 1,8%-ǵa ósti. IV toqsanda ortasha jalaqy mólsheriniń ósýi jyl qorytyndysy boıynsha beriletin qosymsha tólemder men merekelik syıaqylar esebinen eńbekaqy qorynyń ulǵaıýymen baılanysty, - delingen Ulttyq statıstıka bıýrosynyń habarlamasynda.

2023 jylǵy tıisti toqsanmen salystyrǵanda ortasha aılyq jalaqynyń eń joǵarǵy ósimi aqparat jáne baılanys – 32,8%-ǵa, aýyl, orman jáne balyq sharýashylyǵy – 22,7%-ǵa, jyljymaıtyn múlikpen operatsııalar – 20,3%-ǵa salalarynda baıqaldy. Densaýlyq saqtaý jáne halyqqa áleýmettik qyzmet kórsetýde – 7,6%-ǵa, bilim berýde ortasha aılyq jalaqy – 5%-ǵa ósti.

- Óńir boıynsha 2023 jyldyń tıisti toqsanymen salystyrǵanda 2024 jyldyń IV toqsanynda ortasha aılyq ataýly jalaqynyń eń kóp ósýi Almaty jáne Shymkent qalasynda –13,6%-ǵa, Qaraǵandy oblysynda – 13,2%-ǵa, Soltústik Qazaqstan oblysynda – 12,9%-ǵa jáne Aqtóbe oblysynda – 12,6%-dy qurady, - delingen habarlamada.

Óńirler arasyndaǵy ortasha aılyq nomınaldy jalaqynyń eń joǵarǵy jáne eń tómengi mánderi arasyndaǵy araqatynas 2024 jylǵy IV toqsanda 2,1 ese boldy.

Buǵan deıin Ortalyq Azııadaǵy eń joǵary jalaqy alatyn elder týraly jazǵan edik.