Elde Orta kásipkerlikti damytý jospary bekitiledi
ASTANA. KAZINFORM — Jedel tártippen «Alataý qalasynyń arnaıy quqyqtyq rejımi týraly» Konstıtýtsııalyq zańǵa túzetýler engiziledi. Bul týraly Úkimet otyrysynda Prezıdent Joldaýyn iske asyrýdy talqylaý barysynda Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti.
— Otandyq óndiristi qoldaý salasynda «Halyqtyq qurylys» baǵdarlamasynyń ınfraqurylymdyq jobalary úshin qurylys materıaldaryn, metall konstrýktsııalaryn jáne ınjenerlik jabdyqtardy shyǵarýdy damytýǵa erekshe mán beriledi. Sonymen qatar, jedel tártippen «Alataý qalasynyń arnaıy quqyqtyq rejımi týraly» Konstıtýtsııalyq zańǵa túzetýler engiziletin bolady, — dedi Serik Jumanǵarın.
Budan bólek ol shaǵyn jáne orta bıznesti damytý salasynda aǵymdaǵy jyldyń sońyna deıin Orta kásipkerlikti damytý jospary bekitiletinin aıtty.
— Qujat kásiporyndardy uzaq merzimdi jeńildetilgen qarjylandyrýdy jáne tehnologııalyq jańǵyrtýdy qamtamasyz etý boıynsha sharalar keshenin qarastyrady. Sonymen qatar, baqylaý júıesin qaıta júkteý jáne retteýdiń tsıfrlyq modeline kóshý úshin úzilis retinde mıkro jáne shaǵyn bıznes sýbektilerin tekserýge úsh jyldyq moratorıı engizýdiń maqsatqa sáıkestigi týraly sheshim qabyldanady, — dedi mınıstr.
Buǵan deıin habarlanǵandaı, búgin Úkimet otyrysynda Memleket basshysynyń bıylǵy 28 qazandaǵy «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn iske asyrý jónindegi jalpyulttyq is-sharalar josparynyń» jobasy maquldanyp, tıisti qaýly qabyldandy.
Eske salsaq, bıylǵy Joldaýynda Prezıdent mıkro jáne shaǵyn bıznesti tekserýge úsh jylǵa moratorıı engizý máselesin talqylaýdy usyndy.
