Elde óndiris, aýyl sharýashylyǵy jáne jol qurylysy qarqyn aldy

TÚRKІSTAN. KAZINFORM — Memleket basshysy Qazaqstandy shyn máninde Órkendegen jáne Ozyq el etý úshin aýqymdy ári júıeli jumy qolǵa alynǵandyǵyn aıtty.

— Qazir arqany keńge salatyn zaman emes. Álemdik jáne aımaqtyq báseke kúsheıip bara jatyr. Biz Qazaqstandy shyn máninde Órkendegen jáne Ozyq el etý úshin aýqymdy ári júıeli jumysty qolǵa aldyq.

Qazirdiń ózinde bul jumys naqty nátıjesin berip jatyr. Mysaly, sońǵy eki jyl qatarynan óńdeý ónerkásibiniń ósimi 6 paıyzdan asty. Úkimettiń deregine sáıkes, byltyr elimizde 190 kásiporyn ashylyp, 22 myńnan astam adam jumyspen qamtyldy.

Ótken jyly aýyl sharýashylyǵy salasynda 250 óndiris iske qosyldy. Aýyldaǵy sharýalarǵa jaǵdaı jasaý úshin memleket bıýdjetinen 1 trıllıon teńgeden astam sýbsıdııa bólindi. Mundaı qoldaý Táýelsizdik tarıhynda buryn-sońdy bolmaǵan.

Alaıda, biz aýyl sharýashylyǵynyń tıimdiligin kúsheıtýimiz kerek. Bul saladaǵy óndiristiń qunyn ulǵaıtý qajet, — dedi Prezıdent.

Ol elimizdegi 37 jylý elektr stantsııasy jóndelip jatqanyn aıtty.

— Bıyl 222 sý sharýashylyǵy nysany salynyp, jańǵyrtylyp jatyr. Elimizdegi 37 jylý elektr stantsııasy jóndelýde. Sonymen qatar Kókshetaý, Semeı jáne Óskemen qalalarynda jańa jylý elektr stantsııalary salynatyn bolady. Bıyl 440 qosalqy stantsııa jáne 17 myń shaqyrymnan astam elektr jelisi jańartylady, — dedi ol.

Byltyr 1500 shaqyrym temir jol salynyp, jóndeýden ótti. Bul da rekordtyq kórsetkish. Bıyl 3700 shaqyrymnan astam jańa temirjol jelisi tóselip, iske qosylady.

— Al avtokólik joldaryna kelsek, byltyr jalpy uzyndyǵy 13 myń, sonyń ishinde jergilikti mańyzy bar 3 myń shaqyrym tas jol jóndeýden ótti.

Bıyl taǵy 2300 shaqyrymǵa sozylatyn jergilikti joldar jańǵyrtylady. Aldaǵy úsh jyldyń ishinde 32 myń shaqyrym jol normatıvtik talapqa saı jóndeledi.

Jol — strategııalyq máni aıryqsha másele, sebebi, sapaly jol bolsa, jurtymyz turmys-tirshiligin jaqsartyp, kásibin damyta alady, bul belgili nárse.

Alaıda, biz budan da bıik maqsattarǵa qol jetkizýimiz kerek. Jańa Konstıtýtsııamyz jańa jetistikterge jol ashyp, zor tabysqa jetýimizge kepil bolary anyq. Men buǵan kámil senemin, — dedi Prezıdent.

Aıta ketelik  Memleket basshysy Túrkistan oblysyna jumys saparymen bardy.