Elde óndirilgen kómirdiń qansha bóligi JEO men halyqqa jetkizildi

ASTANA. KAZINFORM — Qazaqstanda 2026 jyldyń 10 aıynda temirjol kóligimen 86,7 mln tonna kómir tasymaldandy. Bul ótken jyldyń sáıkes kezeńimen salystyrǵanda 1%-ǵa joǵary.

Elde óndirilgen kómirdiń qansha bóligi JEO men halyqqa jetkizildi
Foto: Kólik mınıstrligi

Kólik mınıstrligi baspasóz qyzmetiniń málimetinshe, jalpy kólemniń 28 mln tonnasy eksportqa jóneltildi, osylaısha ótken jylǵy deńgeıge sáıkes keledi.

— Al, el ishinde 58,6 mln tonna kómir tasymaldandy, ótken jyldyń sáıkes kezeńimen salystyrǵanda 2%-ǵa artyq. Onyń ishinde 54,5 mln tonnasy jylý elektr ortalyqtaryna (JEO), taǵy 4,1 mln tonnasy halyqtyń kommýnaldyq-turmystyq qajettilikterin qamtamasyz etý úshin jetkizildi, — delingen resmı málimette.

Jylytý maýsymynyń turaqty ótýin qamtamasyz etý maqsatynda jylý elektr ortalyqtary men kommýnaldyq-turmystyq sektordyń qajettilikteri úshin kómirdi úzdiksiz tasymaldaý jumystary jalǵasyp jatyr. Atap aıtqanda, aǵymdaǵy jyldyń mamyr-qazan aılary aralyǵynda respýblıka boıynsha 35 mln tonna kómir tasymaldandy. Bul ótken jyldyń sáıkes kezeńindegi kórsetkishpen birdeı. Onyń ishinde 32 mln tonna kómir JEO-larǵa, al 3 mln tonnasy kommýnaldyq-turmystyq qajettilikterge jóneltildi.

Kómirdi úzdiksiz tasymaldaýdy qamtamasyz etý úshin «Qaztemirtrans» AQ-nyń ıeliginde 29 myń jartylaı vagonnan turatyn park bar. Qolda bar jyljymaly quram kómir tasymaldaý qajettiligin tolyq kólemde qamtamasyz etedi.

Osyǵan deıin Energetıka mınıstri Erlan Aqkenjenov ákimder óńirlerde kómirge qatysty jasandy dúrbeleń týdyrmaýy tıis ekenin aıtqan edi.