Elde ókpe obyryn jasandy ıntellekt arqyly anyqtaýǵa ne kedergi
ASTANA. KAZINFORM — Premer-mınıstr Oljas Bektenov ókpe obyryn erte anyqtaý jáne osyǵan qatysty skrınıngten ótkizýge otandyq jasandy ıntellekt júıesin iske qosý jumysyna qatysty túsinik berdi.
Eske salsaq, Quryltaı depýtaty Sergeı Ponomarev Qazaqstanda ókpe obyryn erte anyqtaý jáne skrınıngten ótkizý úshin otandyq jasandy ıntellekt júıesin iske qosýdy usyndy. Osy oraıda ol bıyl qyrkúıek aıynda Úkimet basshysynyń atyna depýtattyq saýal joldap, onda elimizde skrınıngten ótkizýge arnalǵan jasandy ıntellekt negizindegi júıe ázirlengenin atap ótti.
— Tıisti buıryqqa sáıkes, jańa tehnologııany engizý úshin onyń klınıkalyq tıimdiligin, qaýipsizdigin jáne ekonomıkalyq durystyǵyn baǵalaýdy júrgizý qajet. Sodan keıin sheshim qabyldaý úshin densaýlyq saqtaý salasyndaǵy ýákiletti organǵa esep berý talap etilgen. 2024 jyly Medıtsınalyq kórsetiletin qyzmetterdiń sapasy jónindegi birikken komıssııa LungCancerCT tehnologııasyna (Forus Data JShS) qatysty densaýlyq saqtaý tehnologııalaryn baǵalaý is-qımyldaryn júzege asyrdy. Dáleldemelik bazanyń jetkiliksizdigine baılanysty, atalǵan tehnologııanyń klınıkalyq tıimdiligin rastaıtyn zertteý derekteri men nátıjeleri alynǵanǵa deıin ony engizýdi keıinge qaldyrý týraly sheshim qabyldandy, — delingen Oljas Bektenovtiń Quryltaı depýtatynyń saýalyna bergen jaýabynda.
Onyń aıtýynsha, eki jyl ótkennen keıin de ázirleýshi (Forus Data JShS) kompanııa tehnologııanyń tıimdiligine qatysty júrgizilgen klınıkalyq zertteýler týraly derekterdi usynǵan joq.
— Atap aıtqanda, Medıtsınalyq kórsetiletin qyzmetterdiń sapasy jónindegi birikken komıssııanyń oń qorytyndysynsyz bul tehnologııany medıtsına salasynda tájirıbe júzinde engizý múmkin emes. Óıtkeni rastalmaǵan júıeni paıdalaný halyq densaýlyǵyna qaýip tóndiredi, — dedi Premer-mınıstr.
Sonymen qatar, Úkimet ókpe obyry boıynsha skrınıngti kezeń-kezeńimen, sonyń ishinde zamanaýı tsıfrlyq sheshimderdi qoldaný arqyly engizý boıynsha tıisti shara qabyldap jatyr.
Osy maqsatta Densaýlyq saqtaý mınıstrligi tıisti buıryqqa ózgerister engizdi. Bul turǵyda 2027 jyly Shyǵys Qazaqstan, Qaraǵandy jáne Jambyl oblystarynda, sondaı-aq Ulytaý oblysynda tómen dozaly kompıýterlik tomografııany qoldaný arqyly pılottyq skrınıngti ótkizý josparlanǵan.
