Elde muz juqarýyna baılanysty aldyn alý sharalary kúsheıtildi – TJM
ASTANA. KAZINFORM – Qazaqstanda kóktemge qaraı muz juqaryp, sý aıdyndaryndaǵy qaýip kúsheıip otyr. Osyǵan baılanysty el boıynsha aldyn alý jumystary kúsheıtildi.
Bul týraly TJM Tótenshe jaǵdaılardy joıý departamenti basqarmasynyń bastyǵy Magomet Ahrıev málim etti.
Onyń aıtýynsha, qutqarýshylar men jergilikti bólimsheler ózen-kólderde turaqty baqylaý júrgizip jatyr.
– Respýblıka boıynsha 30 myńǵa jýyq reıd uıymdastyryldy. 105 myńnan astam azamatqa qaýipsizdik erejeleri túsindirildi. Onyń ishinde 50 myńǵa jýyq balyqshy arnaıy nusqama aldy, – dedi ol.
Degenmen, qaýipsizdik talaptaryn elemeıtin jaǵdaılar áli de tirkelip otyr.
– Jyl basynan beri 40 adam qutqaryldy. Onyń ishinde 15-i – balalar. Kóp jaǵdaıda adamdar juqa muzǵa shyǵyp, óz ómirine qaýip tóndiredi. Ókinishke qaraı, qarasha aıynan beri muz qatý kezeńinde elimizde 8 adam qaza boldy, – dedi Magomet Ahrıev.
Onyń málimetinshe, qazirgi ýaqytta ońtústik óńirlerden basqa aımaqtardyń basym bóliginde ózen-kólder áli muz qursaýynda. Alaıda muzdyń beriktigi álsirep, qaýipti kezeń bastalǵan.
– Osyǵan baılanysty iri ózenderge erekshe nazar aýdarylyp otyr. Atap aıtqanda, Esil, Ertis jáne Jaıyq ózenderi mańynda baqylaý kúsheıtildi. Bul jerlerde adamdar jıi jınalatyndyqtan, qaýip te joǵary, – dedi ol.
Osyǵan baılanysty TJM mamandary turǵyndardy sý aıdyndarynda saq bolýǵa jáne juqa muzǵa shyqpaýǵa shaqyrady.
Aıta keteıik, eldiń birqatar óńirinde sý tasqynynyń aldyn alý úshin ózenderde muz jarý jumystary júrgizilip jatyr.
