Elde munaı-gaz hımııasynyń bes iri jobasy iske asyrylady
ASTANA. KAZINFORM – Jol kartasy aıasynda jalpy ınvestıtsııa kólemi shamamen 12 mlrd AQSh dollar bolatyn bes flagmandyq jobany iske asyrý, 20 myńǵa deıin turaqty jáne ýaqytsha jumys ornyn qurý, shıkizatty ishki tutyný kólemin keńeıtý, óndiris pen eksporttyq áleýetti arttyrý kózdelgen.
Astanada «Ortalyq Azııa men Kaspıı óńiriniń munaı-gaz hımııasy jáne munaı óńdeýi» atty 13-shi bıznes sammıt aıasynda «Strategııalyq kókjıekter: energetıkalyq egemendik jáne munaı-hımııa salasyn damytý» taqyrybynda plenarlyq sessııa ótti. Sessııa barysynda Qazaqstannyń munaı-gaz hımııasy salasyn damytýdyń perspektıvalary talqylandy.
Energetıka mınıstrliginiń Munaı-gaz hımııasy departamentiniń dırektory Temırlan Ýrkýmbaev munaı-gaz hımııasy ónerkásibi ekonomıkanyń óńdeýshi sektoryn damytýdyń perspektıvaly baǵyttarynyń biri ekenin atap ótti.
Munaı-gaz hımııasy salasyn damytý jónindegi mindetterdi praktıkalyq iske asyrý maqsatynda Energetıka mınıstrligi 2024 jylǵy qazanda 2024–2030 jyldarǵa arnalǵan munaı-gaz hımııasy ónerkásibin damytý jónindegi Jol kartasyn bekitti. Qujat alty negizgi baǵyt pen 34 is-sharany qamtıdy.
Jol kartasy aıasynda jalpy ınvestıtsııa kólemi shamamen 12 mlrd AQSh dollar bolatyn bes flagmandyq jobany iske asyrý, 20 myńǵa deıin turaqty jáne ýaqytsha jumys ornyn qurý, shıkizatty ishki tutyný kólemin keńeıtý, óndiris pen eksporttyq áleýetti arttyrý kózdelgen.
Investorlar úshin uzaq merzimdi ári boljamdy jaǵdaı qalyptastyrýǵa erekshe nazar aýdarylýda. Osyǵan baılanysty Energetıka mınıstrligi «Munaı-gaz hımııasy ónerkásibi týraly» zań jobasyn ázirledi. Qazirgi ýaqytta zań jobasy Qazaqstan Respýblıkasy Quryltaıynyń qaraýynda.
Zań jobasy salany retteýdiń keshendi júıesin qalyptastyrýǵa baǵyttalǵan. Qujatta shıkizat bazasyn qamtamasyz etý, ishki naryqty damytý, jetkizilimderdi júıeli josparlaý jáne salany monıtorıngteý, shıkizat baǵalaryn retteý, sondaı-aq ınvestıtsııalyq jobalardy memlekettik qoldaý tetikteri qarastyrylǵan.
Memlekettik qoldaýdyń negizgi quraldarynyń biri retinde «Ulttyq ındýstrııalyq munaı-hımııa tehnoparki» arnaıy ekonomıkalyq aımaǵy qala beredi. Onyń aýmaǵynda polıpropılen, polıetılen jáne býtadıen óndirisin qosa alǵanda, iri munaı-gaz hımııasy jobalaryn iske asyryp jatqan 19 qatysýshy tirkelgen.
Qazaqstanda jylyna 500 myń tonna polıpropılen óndiretin jobalyq qýaty bar «Kazakhstan Petrochemical Industries» JShS jumys isteıdi. 2025 jyly kásiporyn 375 myń tonna ónim óndirdi.
Jylyna 1,25 mln tonna polıetılen óndiretin zaýyt salý jobasy iske asyrylýda. Kásiporyndy 2029 jyly paıdalanýǵa berý josparlanǵan.
Sonymen qatar bolashaq polıetılen zaýytyn qajetti shıkizatpen qamtamasyz etetin gaz separatsııalaý kesheniniń qurylysy júrgizilýde. Keshendi de 2029 jyly paıdalanýǵa berý josparlanǵan.
Budan bólek, elimizde jylyna 339 myń tonnaǵa deıin býtadıen jáne 880 myń tonna karbamıd óndiretin jobalar iske asyrylýda.
Osylaısha, Qazaqstanda shıkizatpen qamtamasyz etýden jáne bazalyq munaı-gaz hımııasy qýatyn qalyptastyrýdan bastap, qaıta óńdeý óndiristerin damytýǵa deıingi tolyqqandy óndiristik tizbek qalyptasyp keledi.
Aıta ketelik OPEK+ elderi qazandaǵy munaı óndirý kólemin ózgerissiz qaldyrǵan edi.
