Elde múgedektigi bar adamdardyń oqýyna qolaıly jaǵdaı jasalyp jatyr – depýtat

ASTANA. KAZINFORM – Qazaqstanda múgedektigi bar adamdarǵa qolaıly jaǵdaı jasaý jaǵynan ońtaıly jobalar júzege asyp jatyr. Bul týraly Kazinform agenttiginiń BIZDIÑ ORTA podkastynda Májilis depýtaty Tańsáýle Serikov málim etti.

– Búgingi talqylaýdyń ózi qoǵamnyń pikirin qalyptastyrýǵa yqpal etedi. Qoǵam pikiri aqparat keńinen taraǵan kezde júzege asady. Máselen, aptanyń ár sársenbisinde Parlament Májilisinde jalpy otyrys ótedi. Kem degende bir suraq nemese bir zań jobasy múgedektigi bar adamdardyń máselesin qamtıdy. Bul jaǵdaı qoǵamnyń betburysyn ózgerte me?! Árıne, ózgertedi, - dedi T. Serikov.

Onyń aıtýynsha, osydan 20-25 jyl buryn múgedektigi bar adamdardyń máselesi sırek kóterilip jatty. 

– Al qazir kez kelgen BAQ-ta, áleýmettik jelilerde múgedektigi bar adamdardyń problemasy jıi kóterilip jatqanyn baıqap otyrmyz. Qoǵamda bar másele talqylanyp jatyr. Ekinshiden, qoǵamnyń pikirin bilim oshaqtary qalyptastyrady. Mektep pen kolledjderde, ýnıversıtetterde múgedektigi bar adamdarǵa bilim alýǵa qolaıly jaǵdaı jasalyp keledi. Bul turǵyda ýnıversıtetterde bilim alýǵa baryp jatqandary kóbeıdi, ıaǵnı joǵary oqý oryndarynda barynsha jaǵdaı jasaýǵa tyrysyp jatyr. Keıbir ýnıversıtetterde qoldaý ortalyqtary da ashylǵan nemese bilim baǵdarlamalaryn beıimdegen, - dedi depýtat. 

Buǵan deıin elimizde múgedektigi bar adamdar quqyǵyn qorǵaý kúsheıtilgenin jazǵan edik.